Tamyz keńesinde ótken jyldardaǵy nátıjeler qorytyndylandy, jańalyqtar aıtyldy.
Máselen, elimizde alǵash ret erekshe bilim berý qajettilikteri bar balalarǵa arnaıy psıhologııalyq-pedagogıkalyq qoldaý kórsetý standarty ázirlendi. Bul standart mundaı balalardy bilim berýdiń barlyq deńgeıinde súıemeldeýge júıeli kózqarasty bekitedi. Sonymen qatar otbasy men balaǵa kómek kórsetý úshin vedomstvoaralyq ózara is-qımyl tetikterin kózdeıtin «Erekshe bilim berý qajettilikteri bar balalardy keshendi qoldaý týraly» zań jobasy daıyndalyp jatyr.
Búginde elimizdegi mektepterdiń 90%-ynda ınklıýzıvti bilim alýǵa jaǵdaı jasalǵan, al erekshe bilim berý qajettilikteri bar balalardyń 85%-y arnaıy psıhologııalyq-pedagogıkalyq qoldaýmen qamtylǵan. Arnaıy bilim berý uıymdarynyń jelisi 508 mekemeden turady, mektepter janynan 121 qoldaý kabıneti ashylǵan. Ulttyq úzdiksiz ınklıýzıvti bilim berý ortalyǵyn qurý jumysy júrgizilip jatyr.
2024 jyly mektepke deıingi tárbıe men oqytý uıymdarynda, sondaı-aq tehnıkalyq jáne kásiptik bilim berý mekemelerinde pedagog-assıstenttiń shtattyq birligi engizildi. Mektepterdiń úlgilik shtattaryna arnaıy pedagog laýazymy qosyldy, al tirek-qımyl apparaty buzylǵan balalardy fızıkalyq súıemeldeý úshin jeke kómekshi laýazymy engizildi. Psıhologııalyq-medısınalyq-pedagogıkalyq konsýltasııalar, túzetý kabınetteri, ońaltý ortalyqtary jáne aýtızm spektri buzylystary bar balalardy qoldaý ortalyqtary úshin jeke úlgilik shtattar bekitildi.
Aýtızmge shaldyqqan balalardy qoldaý ortalyqtary ońaltý jáne áleýmettik beıimdeý boıynsha memlekettik qyzmet kórsetetin uıymdar tizimine engizildi. Sondaı-aq mektepke deıingi bilim berýdiń úlgilik oqý josparlaryna mundaı balalar úshin túzetý komponenti engizildi.
Múgedektigi bar azamattar úshin tehnıkalyq jáne kásiptik bilim berý uıymdaryna qabyldaý kvotasy 1%-dan 10%-ǵa deıin ulǵaıtyldy.
Laýra BOTABAEVA,
Arnaıy jáne ınklıýzıvti bilim berý ulttyq ortalyǵynyń basshysy