Premer-mınıstrdiń orynbasary Qanat Bozymbaev Memleket basshysynyń halyqty 100% aýyzsýmen qamtamasyz etý jónindegi tapsyrmasyn iske asyrý, sondaı-aq toptyq sý qubyrlaryn salý men rekonstrýksııalaý barysy boıynsha keńes ótkizdi.
Jıynǵa О́nerkásip jáne qurylys mınıstrligi men Sý resýrstary jáne ırrıgasııa mınıstrliginiń, sondaı-aq oblys ákimdikteriniń basshylary qatysty.
Bıyl toptyq sý qubyrlaryn salý jáne rekonstrýksııalaý jobalaryn júzege asyrýǵa 70,2 mlrd teńge qarastyrylǵan, onyń qatarynda 47,5 mlrd teńge Arnaýly memlekettik qordan bólindi. Sý resýrstary jáne ırrıgasııa mınıstrligi tapsyrys berýshi retinde 20 jobany júzege asyryp jatyr, jyl sońyna deıin sonyń 8-in aıaqtaý josparlanǵan. Nátıjesinde, 149 aýyldyq eldi mekende sýmen jabdyqtaý jaqsaryp, 4 aýyl (1,5 myń turǵyn) ortalyqtandyrylǵan aýyzsýǵa qosylady.
Soltústik Qazaqstan, Almaty men Aqmola oblystarynda alty joba boıynsha jobalyq-smetalyq qujattamany ázirleý jumysy júrgizilýde. Bıyl halyq sany 40 myńnan asatyn 49 aýyl ortalyqtandyrylǵan aýyzsý júıesine qosylady. Sý resýrstary jáne ırrıgasııa mınıstrligi barlyq josparlanǵan jobany belgilengen merzimde aıaqtaýdy kózdep otyr.
Qanat Bozymbaev toptyq sý qubyrlary birqatar óńirde aýyzsýdyń negizgi kózi bolyp sanalatynyn atap ótip, olardyń qurylysy men jańǵyrtý jumystaryn jedeldetý qajettigin jetkizdi.
Keńeste óńirlerdiń esebi tyńdaldy. Eske sala keteıik, Memleket basshysynyń halyqty aýyzsýmen qamtamasyz etý jónindegi tapsyrmasyn oryndaý úshin óńirlerge eki transhpen 161 mlrd teńge bólingen. Qazirgi ýaqytta el boıynsha 269 joba júzege asyrylyp jatyr, alaıda olardyń bir bóligi nebári 50%-ǵa oryndalǵan.
Abaı, Aqmola, Qaraǵandy, Pavlodar, Soltústik Qazaqstan, Túrkistan oblystary men Almaty qalasynda jumystyń keshiktirilip, ýaqtyly aıaqtalmaý qaýpi bar óńirler retinde ataldy. Almatyda qarjynyń ıgerilmeýi men jobalardy baıaý júzege asyrý baıqalady. Al Abaı oblysynda, onyń ishinde úsheýi Semeıde bolatyn jeti joba boıynsha jumys áli bastalmaǵan.
«Qys bastalǵanǵa deıin eki aı ýaqyt qaldy. Keler jylǵa ótetin joba bolmaýǵa tıis. Bıyl aıaqtalýy josparlanǵan barlyq nysandar ýaqytynda tapsyrylýy kerek. Sýmen qamtamasyz etý máselesi – meniń jeke baqylaýymda», dedi vıse-premer.
Keńes qorytyndysy boıynsha Qanat Bozymbaev О́ndiris jáne qurylys mınıstrligine, Sý resýrstary jáne ırrıgasııa mınıstrligine jergilikti jerlerde jumystyń barysyna turaqty monıtorıng uıymdastyrýdy, al ákimdikterge jergilikti bıýdjet esebinen qajetti qarajat bólýdi jáne bıyl paıdalanýǵa berilýge tıis barlyq nysandy ýaqtyly aıaqtaýdy tapsyrdy.