Astanada Konstıtýsııa kúnine oraı «Sarap» eksperttik klýbynyń otyrysy ótti. Is-sharany Mádenıet jáne aqparat mınıstrliginiń qoldaýymen Qazaqstandyq qoǵamdyq damý ınstıtýty uıymdastyrdy. Jıynda «Zań men tártip» qaǵıdasynyń júzege asýy, qoǵamnyń quqyqtyq saýatyn arttyrý joldary, osy saladaǵy reformalar talqylandy.
Is-sharaǵa memlekettik organdar men azamattyq qoǵam ókilderi, sarapshylar men ÚEU músheleri qatysty. Otyrystyń «Zań men tártip: azamattyq qoǵam róli» atty alǵashqy bólimine QQDI Qoǵamdyq úrdisterdi zertteý ortalyǵynyń basshysy Rızzat Tasym moderatorlyq etti.
– Memleket basshysy byltyrǵy Joldaýynda «Zań men tártip» qaǵıdatyna aıryqsha toqtalsa, jyl basynda «Ana tili» gazetine bergen suhbatynda «Zań men tártip» qaǵıdaty – shyn máninde kemel demokratııanyń tiregi, quqyqtyq memlekettiń negizi. Sondyqtan bizdiń mindetimiz – bul qaǵıdatty elimizdiń qundylyqtar júıesine barynsha kiriktirip, halyq bolmysynyń, qoǵam ómiriniń ajyramas bóligine aınaldyrý» degen bolatyn. Sondyqtan Konstıtýsııa kúni qarsańyndaǵy «Sarap» jıynyn quqyq júıesiniń damýy, ádilettilik pen teńdik qaǵıdattarynyń nyǵaıýy, sondaı-aq elimizde kemsitpeıtin orta qurýǵa qatysty negizgi máselelerdi kásibı jáne ashyq formatta talqylaýǵa arnadyq, – dedi moderator.
Prezıdent Is basqarmasy janyndaǵy Parlamentarızm ınstıtýty Normatıvtik quqyqtyq aktiler monıtorıngi jáne halyqaralyq tájirıbe ortalyǵynyń basshysy Merýert Qabylbaeva «quqyqtyq saýattyń negizi – zańnamany bazalyq deńgeıde túsiný» dep atap ótti.
Adam quqyqtary jónindegi ulttyq ortalyqtyń Quqyqtyq jáne uıymdastyrý-taldaý jumysy bóliminiń bas ınspektory Álııa Tólegenqyzy konstıtýsııalyq reformalardyń demokratııalyq qaǵıdattardy nyǵaıtýdaǵy mańyzy týraly baıandama jasady.
Sondaı-aq medıa-sarapshy, «Quqyqtyq medıa-ortalyq» QQ dırektory Dıana Okremova ÚEU qyzmetin retteýdegi negizgi problemalar men múmkindikterge toqtalsa, MNU qaýymdastyrylǵan professory, zań ǵylymdarynyń PhD doktory Mýslım Hasenov kemsitýshilikke qarsy zańnamany ázirleýge arnalǵan ǵylymı tásilderdi usyndy.
Al otyrystyń «Qazaqstanda kemsitpeıtin orta qurý: ádiletti quqyqtyq júıe, dinı senim bostandyǵyn qorǵaý, azaptaýǵa qarsy kúres» atty ekinshi bóliminde sarapshylar dinı senim bostandyǵy, dinı qyzmetti júıeli túrde retteý, radıkaldanýdan saqtaný jáne azamattardy dinı senimine jáne basqa da sıpatyna qaraı kemsitýge qarsy is-qımyl máselelerin talqylady.
Jalpy «Sarap» eksperttik klýbynyń otyrysy memlekettik organdar, sarapshylar qaýymdastyǵy jáne azamattyq sektor ókilderi úshin ashyq dıalog alańyna aınalyp keledi. Is-shara aıaǵynda mundaı jıyndar demokratııa qaǵıdattary men quqyq reformalaryn jetildirýge arnalǵan praktıkalyq usynymdar ázirleýge jáne memleket pen azamattyq qoǵam seriktestigin nyǵaıtýǵa oń yqpal etetini aıtyldy.