О́ńirlerge jumys sapary barysynda QHP fraksııasynyń depýtattary nevrologııalyq aýrýlarǵa shaldyqqan naýqastarmen, sonyń ishinde «Epılepsııa» dıagnozy bar azamattarmen kezdesti. Kezdesý kezinde shuǵyl sheshimdi qajet etetin mańyzdy máseleler ortaǵa salyndy, dep habarlaıdy Egemen.kz.
Depýtat Magerram Magerramovtyń aıtýynsha, qazirgi tańda «Jekelegen aýrýlary bar azamattardyń jekelegen sanattaryn tegin jáne (nemese) jeńildikti ambýlatorııalyq qamtamasyz etýge arnalǵan dárilik zattar men medısınalyq buıymdardyń tizbesine» engizilgen preparattardy naryqta erkin satyp alý múmkindigi kúrt tómendegen. Sebebi ákelingen nemese óndirilgen dárilerdiń basym bóligi osy tizim sheńberindegi qajettilikti jabýǵa jumsalady. Biraq bul kólem nevrologııalyq aýrýlarǵa shaldyqqan barlyq naýqastardy qamtýǵa jetkiliksiz.
«Onyń ústine quramynda esirtki zattary bar dárilik zattardy tirkeý jáne ımporttaý vedomstvoaralyq baqylaýdyń qajettiligine baılanysty qıyn», dedi depýtat.
Depýta osy sebepti epılepsııamen aýyratyn azamattar ustamalardyń aldyn alý nemese jedel kómek kórsetý úshin qajetti dárilerdi óz betimen tabýǵa májbúr ekenin atap ótti.
«Alaıda mundaı preparattardyń kópshiligi esirtkilik zattardy qamtıtyny belgili. Sonyń saldarynan azamattar dári-dármekti zańsyz jolmen izdeýge májbúr bolyp, qylmystyq qýdalaý qaterine tap bolyp otyr», dedi ol.
Onyń pikirinshe, otandyq farmasevtıkalyq naryq álemdik tájirıbeden aıtarlyqtaı artta qalǵan.
«Máselen, búginde epılepsııalyq ustamalardy toqtatýǵa arnalǵan muryn arqyly (ıntranazaldy) qoldanylatyn jańa preparattar bar. Bul dáriler ásirese balalar úshin óte qolaıly. Biraq Qazaqstandaǵy dárilik zattardy tirkeý júıesi sheteldik osyndaı preparattardyń qoljetimdiligin shektep, naýqastardyń jaǵdaıyn odan ári qıyndatyp otyr», dedi M.Magerramov
Osyǵan oraı, QHP fraksııasy úsh negizgi talap qoıdy.
«Jekelegen aýrýlary bar azamattardy tegin jáne (nemese) jeńildikti dárilik qamtamasyz etýge arnalǵan tizimge» engizilgen preparattardyń naryqtaǵy tapshylyǵyna jol beretin tájirıbeni toqtatý. Nevrologııalyq aýrýlarǵa shaldyqqan naýqastardy dárilik preparattarmen qamtamasyz etýdegi tapshylyqty joıý. Quramynda esirtki zattary bar dárilik preparattardy tirkeý men ákelý tártibi men merzimin jeńildetip, naýqastarǵa qajetti dárilerdiń qoljetimdiligin qamtamasyz etý.«Bizdiń eń basty maqsatymyz – aýyr dertke shaldyqqan azamattarǵa qoljetimdi, sapaly dári-dármekpen ýaqytyly qoldaý kórsetý. Epılepsııaǵa qarsy preparattardyń tapshylyǵy – tek medısınalyq másele emes, bul azamattardyń ómir sapasyna, tipti olardyń qaýipsizdigine tikeleı áser etetin túıtkil. Sondyqtan Úkimet osy máseleni keıinge qaldyrmaı, júıeli sheshim qabyldaýy tıis», dedi Magerram Mageramov.