Búginde sıfrlyq tehnologııalar ekonomıkanyń barlyq salasynda belsendi engizilip jatyr. Memleket basshysy bıylǵy Joldaýynda sıfrlandyrýdyń el damýyndaǵy róline aıryqsha toqtaldy. Osy rette, aýyl sharýashylyǵynda jasandy ıntellektiniń engizilýi dástúrli eginshilikten zııatkerlik agroónerkásipke kóshýge múmkindik beredi. Qostanaı oblysynda ósimdik sharýashylyǵynda «Metos» kompanııasynyń ozyq tehnologııalary engizilip jatyr. Olar 35+ daqyldardaǵy aýrýdyń 85-ten astam túrin erte anyqtaý úshin, sondaı-aq aýa raıynyń saǵattyq boljamyn qamtamasyz etý úshin qoldanylady.
«Barlyq derek naqty ýaqyt rejiminde usynylady, bul tıimdilikti arttyrý jáne egin shyǵynyn azaıtý úshin jedel sheshim qabyldaýǵa múmkindik beredi. Mal sharýashylyǵynda da biz «aqyldy» fermalar tujyrymdamasyn engizip jatyrmyz. Elektrondyq bolıýs – kapsýlalardyń kómegimen sútti sıyrlardyń densaýlyǵyn táýlik boıy zııatkerlik taldaý qamtamasyz etiledi. Jasandy ıntellekti bastapqy derekterdi lezde óńdeý arqyly aýrýdyń damýyn boldyrmaıtyn yqtımal máselelerge naqty usynys beredi.
Osylaısha, búkil «aqyldy» ferma úshin tótenshe týyndaıtyn ártúrli másele aıtarlyqtaı azaıady», dedi oblys ákimi Qumar Aqsaqalov «KIA Qazaqstan» zaýyty aýmaǵynda ótken «Jasandy ıntellektiniń óńir damýynda alatyn orny» atty ınvestısııalyq forýmda.
Aımaq basshysynyń aıtýynsha, ınvestorlardy qoldaýdyń óndiristik, kóliktik jáne servıstik ınfraqurylymy jetildirilip jatyr
«Nátıjesinde, keıingi 5 jylda óńir ekonomıkasyna 3 mlrd dollar tartyldy. Birinshi toqsanda oblys ekonomıkasyna shamamen 200 mln dollar ınvestısııa salyndy. Qostanaı – el kóleminde boksıt, asbest jáne temir rýdasyn óndiretin birden-bir aımaq. Biz temir ılemderi men temir keni konsentratyn óndirý jaǵynan, avtomobıl, AО́K-tiń óńdelgen ónimderin, onyń ishinde azyq-túlik ónimderin eksporttaý boıynsha birinshi orynda turmyz. Qazirde óńir ekonomıkasyn odan ári damytatyn tórt negizgi strategııalyq baǵytty belgilep aldyq, olar – mashına jasaý salasy, kólik-logıstıkalyq ınfraqurylym, qara metallýrgııa jáne agroónerkásip kesheni», dedi ákim.
Eýroodaqtyń Qazaqstandaǵy elshisi Aleshko Sımkıch astyq ónimdiligin arttyrý, sýdy tıimdi paıdalanýdyń ozyq tehnologııasyn keńirek qoldanysqa engizý turǵysynan Qostanaı oblysymen ekijaqty tıimdi baılanys ornatýdyń mańyzy zor dep esepteıtinin jetkizdi. Sıfrlyq damý vıse-mınıstri Dmıtrıı Mýn «Astana Hub» tehnoparkiniń jáne onyń Qostanaıdaǵy fılıaly – «Qostanai Hub»-tyń mańyzyn atap ótti. Forým aıasynda aýqymdy tehnologııalyq kórme uıymdastyrylyp, onda jasandy ıntellekti tehnologııalaryn bızneste, óndiriste belsendi qoldanatyn kompanııalardyń ónimderi kópshilik nazaryna usynyldy. Solardyń biri – «ERG» quramyndaǵy «VTS» kompanııasy.
«Biz forýmǵa jasandy ıntellekti baǵytynda jasalǵan 3 joba alyp keldik. Birinshisi, karer mańynda jumys isteıtin tehnıkalardyń barlyq is-qımylyna monıtorıng jasaıtyn sıfrlyq syńary. Sondaı-aq jumysshylardyń qarym-qatynasyn jeńildetetin, qyzmettik qajettilikterine baılanysty aqparatty tez alýǵa bolatyn «Ergiz» júıesi bar. Úshinshisi – kez kelgen avtomattandyrylǵan óndiris orynynyń myńdaǵan is-qımylyn jınaqtap, kásiporyn basshylyǵyna, tehnologııaǵa jaýapty qyzmetkerlerge áp-sátte málimet, baǵyt-baǵdar berip otyratyn «Mes» jobasy. Bizdiń kompanııa engizgen ınnovasııalyq baǵdarlama bútin bir zaýyttyń eńbek ónimdiligin 30%-ǵa arttyrady», deıdi «Eýrazııalyq odaq BTS» JShS bas dırektory Maǵaýııa Ysqaqov.
Qostanaı oblysy