Árbir Joldaý – el damýynyń jańa kezeńine bastaıtyn mańyzdy qujat. Onyń negizinde naqty iske asatyn jaýapkershilik júktelgen mindetter men bastamalar jatyr. Sondyqtan jyl saıynǵy Joldaýdy uıym múshelerimen jáne rýhtas áriptesterimizben birge jańa saıası kezeńge jasalatyn josparlar men basym baǵyttardy aıqyndaıtyn mańyzdy qadam retinde qabyldaımyz.
Jasandy ıntellekt arqyly jańa basqarý formalaryn engizý, memlekettik qyzmet pen qoǵamda sıfrlandyrýdy tereńdetý, sondaı-aq naqty nátıjelerge jumys isteý Joldaýdaǵy negizgi messedjderdiń biri boldy. Sonymen qatar Memleket basshysy azamattardyń qarjylyq saýatyn arttyrý qajettigine erekshe toqtaldy. Bul baǵytta júzege asyrylyp jatqan «Amanat» partııasynyń «Qaryzsyz qoǵam» jobasyn ári qaraı jalǵastyrý mańyzdy ekenin aıtty.
Partııalyq joba aıasynda kúni búginge deıin 845 myń adam qarjylyq saýatyn arttyryp, zańgerlik kómek aldy. Mundaǵy basty maqsat – halyqtyń qaryzyn azaıtý ǵana emes, azamattardyń tabysynyń turaqtylyǵyn qamtamasyz etý. Atalǵan joba elimizdiń túkpir-túkpirinde halyqtyń qarjylyq bilimin keńeıtip, ekonomıkalyq turǵydan ómir sapasyn arttyrýǵa jol ashty. Bul baǵyttaǵy is-sharalar keshenin «Amanat» partııasy qarqyndy jalǵastyrady.
Sondaı-aq partııa tarapynan «Sıfrlyq qoǵam» jobasy iske qosyldy. Ol túrli áleýmettik topty qamtıdy. Sıfrlyq ortadaǵy qaýipsizdik pen bilim ár adamǵa qoljetimdi bolýy kerek. Partııalyq joba aıasynda jastar men azamattardyń aqparattyq keńistikte erkin ári qaýipsiz bolýyna jaǵdaı jasalady.
Prezıdent eko-sana men sýdy únemdeý mádenıetin qalyptastyrý jaıynda da sóz etti. «Taza Qazaqstan» jalpyulttyq jobasyn júzege asyryp, atsalysyp júrgen jastarǵa erekshe alǵysyn jetkizdi. Turaqty is-sharaǵa aınalǵan «Taza Qazaqstanǵa» rýhtastardyń qosqan úlesi erekshe. Byltyrdan beri Jastar qanaty ekologter, eriktilermen birlese aýqymdy jumys atqardy. 1 200 shaqyrymdy qamtyǵan Road-estafeta, ár beısenbi ótetin turaqty tazalyq aksııalary men túrli ekologııalyq is-shara qoǵam belsendiligin arttyryp, qorshaǵan ortaǵa degen jaýapkershilikti tereńdetýge zor yqpal etip jatyr. Bul bastamalar ekologııalyq tárbıeniń úlgisine aınalyp, el bolashaǵy úshin mańyzdy mádenı ózgeristerge jol ashady.
Memleket basshysy jastarǵa úlken senim, jaýapkershilik artyp otyr. Osy údeden shyǵyp, jastardyń qoǵamǵa paıdaly bolýy – jaýapty ári mańyzdy is. Jańashyldyq, jasampazdyq, otanshyldyq qasıetterdi alǵa tartyp, biz de óz tarapymyzdan júıeli jumys isteımiz.
Aqerke ISKANDEROVA,
«Amanat» partııasy janyndaǵy «Jastar rýhy» qanatynyń tóraǵasy