Qarasha aıyna deıin medısınalyq uıymdarǵa tirkeý naýqany ótedi. Osy kezeńde azamattar óz emhanasyn aýystyrýǵa múmkindik alady. Bul rásimdi tolyqtaı onlaın rejimde «eGov.kz» portaly nemese «eGov Mobile» mobıldi qosymshasy arqyly medısınalyq uıymǵa barmaı-aq oryndaýǵa bolady.
Qyzmet emhanaǵa tirkelip, ýchaskelik dárigerdi tańdaýǵa múmkindik beredi. Tańdalǵan dárigerge sáıkes medısınalyq qyzmet kórsetý aýmaǵy júıede avtomatty túrde kórsetiledi. Naýqan qorytyndylary kelesi kúntizbelik jyldyń 1 qańtarynan bastap kúshine enedi. Aldyńǵy uıymnan tirkeýden shyǵarý jańa ótinim rastalǵannan keıin avtomatty túrde júzege asyrylady.
Naýqannan tys ýaqytta da emhanany aýystyrýǵa bolady. Bul basqa eldi mekenge qonys aýdarǵanda, jumys nemese oqý ornyn aýystyrǵanda, sondaı-aq emhana qaıta uıymdastyrylǵan nemese jabylǵan jaǵdaıda bolýy múmkin. Mundaı jaǵdaıda qyzmetti jylyna bir ret qoldanady.
Bul qyzmettiń joǵary suranysqa ıe ekenin statıstıka da dáleldeıdi. О́tken jyly tirkelý qyzmetin azamattar 3,6 mln-nan astam ret paıdalansa, olardyń 2 905 013-i «eGov.kz» portalynda, 722 198-i «eGov Mobile» qosymshasynda rásimdeldi. Bıyl (shilde aıyna deıin) portal arqyly 1 135 628, al mobıldi qosymsha arqyly 1 046 354 ótinim qabyldandy.
Atalǵan qyzmet arqyly kámeletke tolmaǵan balalardy jáne 18 jastan asqan áreketke qabiletsiz dep tanylǵan azamattardy olardyń qamqorshylary onlaın túrde emhanaǵa tirkeı alady.
Jańartý Sıfrlyq damý, ınnovasııalar jáne aeroǵarysh ónerkásibi mınıstrliginiń Memlekettik qyzmetter kórsetiletin komıteti, «Ulttyq aqparattyq tehnologııalar» AQ jáne Densaýlyq saqtaý mınıstrligi ózara yntymaqtastyǵynyń aıasynda júzege asyryldy.
Bekzat Myńaıdar