Reseıdiń Sankt-Peterbýrg qalasynda Halyqaralyq birikken mádenıetter forýmy óz jumysyn bastady. Sharaǵa Mádenıet jáne aqparat mınıstri Aıda Balaeva bastaǵan qazaqstandyq delegasııa da qatysty. Osymen on birinshi ret ótkizilip otyrǵan forým ashyq dıalog júrgizýge, tájirıbe almasýǵa, jańa ıdeıalardy júzege asyrýǵa arnalǵan biregeı alańǵa aınaldy.
Bıyl forým «Mádenıetke oralý – jańa múmkindikter» taqyrybynda uıymdastyryldy. Qatysýshylar mádenı murany saqtaý joldaryn, sıfrlyq tehnologııanyń rólin, kreatıvti ekonomıkany damytý men óner arqyly halyqaralyq yntymaqtastyqty nyǵaıtý máselelerin talqylady.
Mınıstr forým barysynda mádenıet saıası qural emes, rýhanı birlikke, jasampazdyqqa jáne shabytqa jeteleıtin qaınar kóz ekenin aıtty. Sondaı-aq ol mádenı keńistiktiń táýelsizdigi men tazalyǵyn saqtaýǵa baǵyttalǵan birlesken sharalar qabyldaýdy usyndy. Aıda Balaeva negizgi múmkindikter retinde mádenıettiń bilim berý qyzmetin, mádenı dıplomatııany, kreatıvti ekonomıkany jáne sıfrlyq tehnologııalardy atap ótti.
«Keıingi onjyldyqtarda jahandaný, sıfrlandyrý, ýrbanızasııa ómirimizdi kúrt ózgertip jatyr. Bul úderis yntymaqtastyqqa jańa jol ashqanymen, dástúr men tarıhı jadtyń joǵalýyna da qaýip tóndiredi. Sondyqtan mádenıetke oralý murany saqtaý ǵana emes, ony zamanaýı álemge beıimdeýdiń aıqyn kórinisi», dedi mınıstr.
Forým aıasynda A.Balaevanyń Reseı Federasııasynyń Mádenıet mınıstri Olga Lıýbımovamen ekijaqty kezdesýi ótti. Jıynda taraptar Qazaqstan men Reseıdiń mádenı-gýmanıtarlyq saladaǵy yntymaqtastyǵynyń qazirgi jaǵdaıyn jáne keleshegin talqylady. Aıda Balaeva reseılik tarapqa mádenı bastamalardy turaqty qoldap kele jatqany úshin alǵys bildirdi.
Atap aıtqanda, qazan aıynda ótetin Reseıdegi Qazaqstan mádenıeti kúnderiniń baǵdarlamasy mazmundy bolǵaly tur. Jańa Tretıakov galereıasynda Ábilhan Qasteev atyndaǵy Memlekettik óner mýzeıiniń toptamasynan alynǵan jaýharlar kórmesi ashylady. Kishi teatr sahnasynda zamanaýı fılosofııalyq drama «Parasat maıdany» usynylady. Bul kúnderi reseılik kórermen Qazaqstan kınosy men zamanaýı qazaqstandyq kınematografııanyń jańa esimderimen, ózekti taqyryptarymen tanysady. Qazaqstan mádenıeti kúnderiniń qorytyndy is-sharasy elimizdiń ónerpazdary qatysatyn Gala-konsertpen aıaqtalady dep josparlanyp otyr.
Kezdesý qorytyndysynda qos mınıstr seriktestikti tereńdetýge, úzdik tájirıbe almasýǵa, birlesken jobalardy júzege asyrýǵa jáne eki eldiń mádenıet mekemeleri arasyndaǵy tikeleı baılanystardy damytýǵa nıetti ekenderin rastady.