Kúni keshe Máskeý tórinde qazaqtyń HH ǵasyrdaǵy uly tulǵasy, kúıshi-kompozıtor, dırıjer, Qazaqstannyń halyq ártisi Nurǵısa Atabaıuly Tilendıevtiń týǵanyna 100 jyl tolýyna arnalǵan IýNESKO sheńberinde ótip jatqan dúbirli mereke ultymyzdyń rýhanı murasynyń álemdik keńistikte bıik orny baryn taǵy bir dáleldedi. Buǵan deıin Qytaıda, Qyrǵyz Respýblıkasynda da joǵary deńgeıde ótken dúbirli toı Reseı Federasııasynda da álem jurtshylyǵyn dúr silkintti.
Qazaqstan Respýblıkasynyń Reseıdegi Tótenshe jáne ókiletti elshiligi men Almaty oblysy ákimdigi uıymdastyrǵan sharalar kórgen jannyń kóńilinen shyqqany sózsiz. Máskeýdiń 550 kórermen tamashalaıtyn «Gelıkon-Opera» mýzykalyq teatrynyń foıesinde ultymyzdyń rýhanı qundylyqtaryn pash etken kórme kózdiń jaýyn aldy. Uly tulǵa týyp-ósken eldiń turmys-tirshiligin, mádenıeti men ónerin osy jádigerler áıgilegendeı.
Mundaǵy qazaqtyń halyq aqyny Jambyl Jabaevtan bastap, keıingi tarıhı tulǵalar ómirinen, ulttyq óner týyndylarynan syr shertken buıymdar qasynda áıgili qolóner sheberi Dárkembaı Shoqparulynyń uly Dáýlet óz shákirtterimen qazaqtyń torsyǵynyń qalaı daıyndalyp, tigiletinin sol jerde kórsetti. Almaty aportynyń kórmesi de tartymdy kórinistiń biri boldy. Osyndaı ádemi áserge bólegen kórmeden keıin jurt konsert zalynda ıne shanshar jer qaldyrmady.
Konsertti elshi Dáýren Abaev sóz sóılep ashty.
Aldymen Nurǵısa Tilendıevtiń qyzy Dinzýhranyń dırıjerligimen kompozıtordyń «Ata tolǵaýy» kúıin «Aq jaýyn» memlekettik kameralyq orkestri tartyp, oǵan memlekettik «Altynaı» halyq bıi ansambli bıledi.
Kompozıtordyń «Alataýyn» shyrqaǵan Farhat Kýbıev, «Kýá boldy» shalqytqan Nurǵısa nemeresi Daıana Tilendıeva, «Aqsaq qulandy» shertken Syrym Shonbaev,«Qaıran meniń júregimdi» salǵan Rýhııa Baıdúkenova, «Kósh kerýen» kúıine bılegen «Altynaı» ansambli, «Dýbosekovo zıratynda» ánimen tolqytqan Tólegen Rahymbaev, «Kóńil tolqynyn» shertken Seken Turysbek, «Saryjaılaýdy» sharyqtatqan Medet Orynbaev, Musa Saparáli, Ádil Ahmetjanov, «Aqqý» kúıine bılegen bıshi Ásel Erjanova, «Ájemeni» áýeletken Bıbigúl Qılymhan, «Álqıssany» naqyshyna keltire tartqan kúıshi Nurken Áshirov, «Qustar ánimen» terbegen Farhat Kýbıev pen Medet Orynbaev ónerine kórermen qaýym yqylaspen qol soqty. Al Nurǵısa Tilendıevtiń «Mahambetin» tyńdaǵanda teatrdy asqaq rýh kernedi.
Osy shyǵarmalardy súıemeldegen «Aq jaýyn» memlekettik kameralyq orkestrine dırıjerlik jasaǵan Dinzýhra Tilendıevanyń da, Nurken Áshirovtiń de ónerine halyq razylyq bildirdi.
Bir jarym saǵat áp-sátte bite qalar dep kim oılaǵan? Konserttiń shymyldyǵy kompozıtordyń Qadyr Myrza Áli óleńine jazylǵan «О́z elim» ánimen jabyla bastaǵanda, kórermen iltıpatynda shek bolmady.
Sahna Máskeý qalasynyń ákimdiginen, Qazaqstan elshiliginen, basqa da resmı oryndardan kelgen qurmet-qoshemet gúlderine tolyp ketti.
Saǵatbek MEDEÝBEKULY