Boryshkerlerdi anyqtaıtyn «Sıfrlyq baqylaý» júıesiniń múmkindikteri keńeıtildi. Ony Ádilet mınıstrligi, Jeke sot oryndaýshylarynyń Respýblıkalyq palatasy jáne Bas Prokýratýra birlesip júzege asyrdy, dep habarlaıdy Egemen.kz.
Ádilet mınıstrliginiń habarlaýynsha, búginde Bas prokýratýranyń «Sıfrlyq baqylaý» júıesi arqyly boryshkerlerdi tek qala kósheleri men qoǵamdyq oryndarda ǵana emes, sondaı-aq áýejaılarda, temirjol jáne metro nysandarynda, áleýmettik mańyzy bar ǵımarattarda da anyqtaý múmkindigin iske qosylǵan.
«Boryshkerler halyqqa qyzmet kórsetý ortalyqtarynda memlekettik qyzmetterdi alý kezinde nemese áýe jáne temirjol bıletterin satyp alý barysynda derekter bazasy arqyly avtomatty túrde bet-beıne sáıkestendirý arqyly anyqtalyp jatyr», delingen habarlamada.
Derekterge sáıkes, 2024 jyldyń qańtar aıynan izdeýde júrgen boryshkerler sany 4560 adamdy quraǵan. Onyń ishinde 2118 tulǵanyń turǵylyqty mekenjaılary anyqtalyp, jalpy anyqtaý kórsetkishi 39,3% boldy.
Sonymen qatar bul júıe arqyly boryshkerlerge tıym salynǵan avtokólikterdi izdestirý múmkindigin iske asyrý jumystary júrgiziledi. Osy baǵyttaǵy jumystar Bas prokýratýra, Ádilet mınıstrligi jáne Jeke sot oryndaýshylardyń Respýblıkalyq palatasynyń ózara yntymaqtastyǵy aıasynda júzege asyrylady.
«Qalalyq beınebaqylaý kameralary men jasandy ıntellekt quraldarynyń kómegimen anyqtalǵan, paıdalanýǵa tıym salynǵan kólikter polısııa qyzmetkerleriniń qatysýymen toqtatylyp, arnaıy bekitilgen turaqtarǵa jetkiziledi. Odan ári zań talaptaryna sáıkes sot aktilerin tolyq ári ýaqtyly oryndaýdy qamtamasyz etedi. Atalǵan sharalar óndirip alýshylardyń quqyqtary men zańdy múddelerin qorǵaýǵa, sondaı-aq sot sheshimderiniń oryndalý tıimdiligin arttyrýǵa baǵyttalǵan», delingen habarlamada.