Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýynda óńirlerge ınvestısııa tartý jáne óńdeý ónerkásibin damytýdyń mańyzyna aıryqsha toqtalǵany belgili. Prezıdent júktegen mindetti júzege asyrý maqsatynda Jambyl oblysynda eki birdeı zaýyt salynbaq.
Baızaq aýdanynda ýaqyt suranysyna saı jańa qant zaýytynyń qurylysy bastaldy. Jambyldyq sharýalar úshin jaǵymdy jańalyqqa aınalǵan jobany qytaılyq «Zhongkai Guoyuan Industrial Investment Co.» kompanııasy qolǵa alyp otyr. Al «Oushangyuan Process & Equipment Intelligent Co.» kompanııasy aýqymdy jobanyń tehnologııalyq seriktesi retinde iske kiristi. Jańadan boı kóteretin zaýyttyń áleýetine nazar aýdarǵan Aýyl sharýashylyǵy mınıstri Aıdarbek Saparov pen óńir basshysy Erbol Qarashókeev ilkimdi jobanyń óńir ekonomıkasyn ilgeriletýge qosar úlesi zor ekenine senimdi.
Resmı derekke júginsek, aýqymdy jobany júzege asyrý úshin shamamen 200 mln dollar kóleminde ınvestısııa tartylǵan. Aldaǵy ýaqytta kásiporynda 350-den astam jańa jumys orny ashylmaq. Jańa zaýytta jylyna 1 mln tonna qant qyzylshasy óńdelip, 120 myń tonna qant, melassa men jom sekildi qosalqy ónimder óndirýge múmkindik týady. Investorlardyń aıtýynsha, joba tolyqqandy júzege asqan kezde barlyq óńir qantpen qamtylyp, ımportqa degen táýeldilik aıtarlyqtaı azaıady. «Zhongkai Kazakhstan International Sugar Industry Company» kompanııasynyń bas dırektory Sıao Anbaonyń sózine sensek, óńirde óńdeý ónerkásibin damytýǵa barlyq múmkindik qarastyrylǵan. Eń bastysy, jergilikti atqarýshy bılik ókilderi sheteldik ınvestorlarmen birlese jumys atqarýǵa barynsha yntaly bolyp otyr. О́ńir bıliginiń qoldaýy ınvestorlardyń iri jobalardy alańsyz júzege asyrýyna múmkindik týǵyzady.
Jańadan boı kóteretin qant zaýyty óńirde agroónerkásiptik keshendi damytýǵa serpin berip qana qoımaı, qant qyzylshasy óndirisin jańa deńgeıge kóteredi. Al jambyldyq sharýalar kásiporyndy shıkizatpen qamtýǵa tolyqtaı daıyn ekenin aıtady. Qant zaýytynan bólek, Taraz qalasynyń ındýstrııalyq aımaǵy alańynda aýyl sharýashylyǵy tehnıkasyn shyǵarýǵa mamandanǵan kásiporyn qurylysy bastaldy. Irgeli jobany iske asyrýǵa «Kaz FM World agriculture machinery» JShS (Nuode Network Technology Co., Ltd, Qytaı) bekinip otyr. Jaýapty tulǵalardyń aıtýynsha, óndiris alańy bes gektar aýmaqqa deıin sozylyp jatyr. Jańa zaýytta traktordyń birneshe túri jáne tirkeme jabdyqtaryn shyǵarý kózdelgen. Irgeli jobany júzege asyrý úshin 10 mlrd teńge kóleminde ınvestısııa tartylǵan. Zaýyt tolyq qýatynda jumys istegen kezde jylyna 2 000 birlik tehnıka shyǵarýǵa múmkindik týmaq. 55 jańa jumys orny ashylady.
«Otandyq brendpen tehnıka shyǵarýdyń mańyzy zor. Bul qadam agrarlyq sektor úshin aıryqsha mánge ıe. О́zimizde óndiriletin tehnıkanyń sharýalar úshin qoljetimdi bolatyny sózsiz. Olar zamanaýı qural-jabdyqtan taryqpaıdy. Jańa kásiporyn aýyl sharýashylyǵyndaǵy básekelestikti arttyrady. Sondaı-aq óńirdiń óndiristik áleýetin ústemeleýge múmkindik týǵyzady», deıdi óńir basshysy Erbol Qarashókeev.
Jalpy, óńirge ınvestısııa tartý jumysy sońǵy ýaqytta qarqyn aldy. Osy jyldyń segiz aıyndaǵy kórsetkishke kóz júgirtsek, oblystyń negizgi kapıtalyna 391,7 mlrd teńge kólemindi ınvestısııa tartylǵan. Bul kórsetkish ótken jyldyń alǵashqy segiz aıymen salystyrǵanda, 32,4%-ǵa joǵary. Aldaǵy eki-úsh jyldyń bederinde óńirde jalpy quny 300 mlrd teńgeden asatyn 20 aýyl sharýashylyǵy jobasyn júzege asyrý kózdelgen. Bul jobalar tolyqqandy iske asqan kezde oblystyń eksporttyq áleýeti aıtarlyqtaı artady.
Jambyl oblysy