Mańǵystaý oblysyndaǵy Saıyn Shapaǵatov aýylynda óńirlik elektrtoraptyq kompanııasynyń jańa qosalqy stansasy ashyldy. Qosalqy stansa 10 myńǵa jýyq turǵyny bar, oblys ortalyǵynan 30 shaqyrym qashyqtyqta ornalasqan aýyldy elektr energııasymen qamtamasyz etý jolyndaǵy mańyzdy qadam.
Investısııalyq baǵdarlamany iske asyrý sheńberinde júrgizilgen, quny 4 mıllıard teńgeden asatyn qosalqy stansa qurylysynda qurylys-montaj jumysy tolyǵymen aıaqtalyp, paıdalanýǵa berildi. Jańa stansada ozyq halyqaralyq standarttarǵa sáıkes keletin zamanǵa saı jabdyqtar ornatylǵan.
– Joba boıynsha munda 2h10 MVA qýat transformatorlary qarastyrylǵan. Sondaı-aq jańa nysanda «MО́EK» AQ óńirlik ortalyǵynyń dıspetcherlik qalqanyna derekterdi bere otyryp, qosalqy stansanyń monıtorıngi men basqarý júıesi engizildi. Bul naqty ýaqyt rejiminde jedel aqparatty, teleólshemderdiń aǵymdaǵy mánderin, kommýtasııalyq apparattardyń jaı-kúıin kórsetýge, sondaı-aq jeliniń jaǵdaıyn baǵalaýdy oryndaýǵa múmkindik berse, al ol óz kezeginde elektr qýatyn bólý men tutynýdyń naqty esebin júrgizýge múmkindik beredi, – deıdi «Mańǵystaý óńirlik energokombınaty» AQ damý jáne qamtamasyz etý jónindegi basqarma tóraǵasynyń paıdalaný jónindegi orynbasary Murat Imanov.
Saıyn Shapaǵatov aýylynyń tutynýshylaryn elektrmen jabdyqtaýdy «Aqshuqyr» PS-110/10 kV, «Áýejaı» PS-110/10 kV eki qosalqy stansasy júzege asyrady. Aýylda shaǵyn jáne orta bıznes nysandary, jańa turǵyn úıler men áleýmettik nysandardyń ashylýyna baılanysty elektr jelilerine túsetin júktemeniń artýy baıqaldy. Bul jaǵdaılar «MО́EK» AQ-na jańa qosalqy stansa salý qajettigin ańǵartqan bolatyn. Nátıjesinde, keshe ǵana halyq ıgiligine berilgen qosalqy jańa stansa ashyldy. Stansa turǵyndar sany áli de arta túsetin aýylǵa barynsha qajetti nysandardyń biri.
Mańǵystaý oblysy