Shyǵys Qazaqstan oblysy Ulan aýdanynyń Bozanbaı aýylynda kórkem Búrkit tóbeniń eteginde «Shyǵys Salbýryny-2025» atty V mereıtoılyq halyqaralyq festıval bastaldy. Oǵan Mońǵolııa, Reseı, Vengrııa, Qyrǵyzstan, Ispanııa jáne basqa da elderden qonaqtar men qatysýshylar jınaldy, dep habarlaıdy Egemen.kz.
Sharanyń qurmetti qonaqtary qatarynda Týrızm jáne sport mınıstrliginiń memlekettik jattyqtyrýshysy Bazarbek Kúntýǵan, Respýblıkalyq qusbegiler federasııasynyń vıse-prezıdenti Baǵdathan Múptekeqyzy, Mońǵolııadan kelgen ańyzǵa aınalǵan búrkitshi Aısholpan Nurǵaıyp jáne halyqaralyq etnomádenı uıymdardyń ókilderi bar.
ShQO ákimdiginiń málimetinshe etnoalańda 30-dan astam kıiz úıden quralǵan etnoaýyl tigildi. Munda sheberlik sabaqtary, qolóner kórmeleri, sondaı-aq qazaqtyń salt-dástúrleri kórsetilip jatyr: «Ashamaıǵa mingizý», «Betashar», «Tusaý kesý», «Qyrqynan shyǵarý», «Besikke salý», «Syrǵa salý».
Festıvaldiń basty oqıǵasyna – jyrtqysh qustarmen ań aýlaıtyn qusbegiler saıysy jatady. Sonymen qatar, tazy jarysy, kókpar jáne basqa da ulttyq oıyndar uıymdastyrylǵan.