Májilis depýtaty Ermurat Bapı buǵan deıin joldaǵan depýtattyq saýalyna oraı ýákiletti memlekettik organdardan Birtutas esep júıesi (BEJ) jobasynyń júzege asyrylýy jóninde resmı túsindirmeler men egjeı-tegjeıli aqparat alǵanyn aıtty, dep habarlaıdy Egemen.kz.
Depýtattyń aıtýynsha, qosymsha zertteý jáne tıisti organdarmen ótkizilgen konsýltasııalar nátıjesinde keıbir buqaralyq aqparat quraldarynda jarııalanǵan materıaldarda onyń depýtattyq saýaly burmalanyp túsindirilgeni anyqtalǵan.
«Resmı derekterge sáıkes, BEJ jobasy tolyqqandy iske qosýǵa daıyndyq kezeńinde tur. 15 tamyzdan bastap jasandy ıntellekt júıesimen biriktirilgen ınternet-monıtorıngtiń pılottyq jobasy iske qosyldy. Ol táýligine 800-ge jýyq zańsyz saıtty avtomatty túrde buǵattap otyr. Buǵan deıin mundaı jumystardy memlekettik organdar qolmen oryndap, ol birneshe aı ýaqyt alatyn», dedi Ermurat Bapı.
Sonymen qatar depýtat fıskaldyq organdarmen keńesýden keıin buryn BAQ-ta jarııalanǵan «júıe engizilýi nátıjesinde zańdy bıznes salyq túsimderin joǵaltady» degen tujyrymnyń dálelsiz ekenin atap ótti.
«Biryńǵaı esep júıesiniń basty maqsaty – Qazaqstandaǵy oıyn bıznesi salasynda ashyq ári senimdi sıfrlyq orta qalyptastyrý jáne halyq arasynda qumar oıyndarǵa táýeldilikti taratatyn zańsyz ınternet-resýrstardy buǵattaý», dedi ol.
BEJ júıesiniń memlekettik operatory – Týrızm jáne sport mınıstrligi janyndaǵy «Operator ESÝ» JShS, ol 100% memlekettik qatysý úlesine ıe uıym bolyp tabylady. Júıe azamattardy zań boıynsha qumar oıyndarǵa qatysýǵa tyıym salynǵan sanattardan (21 jasqa deıingi tulǵalar, boryshkerler jáne t.b.) qorǵaýǵa jáne aqshany jylystatýǵa qarsy is-qımyl zańnamasyn saqtaýǵa baǵyttalǵan.
Barlyq derekter «Ulttyq aqparattyq tehnologııalar» AQ ınfraqurylymynda saqtalyp, júıe tolyq memlekettik baqylaýda bolady. Sondyqtan derekterdiń syrtqa shyǵý nemese aǵyp ketý qaýpi joq.
Ermurat Bapıdiń bastamasymen jýyq arada býkmekerlik kompanııalardyń aınalymynan 3% kóleminde maqsatty aýdarym engizý týraly zańnamalyq túzetýler qarastyrylmaq. Onyń ishinde:
1% – «Qazaqstan halqyna» qoǵamdyq qoryna,
1% – «SportQory» sportty damytý qoryna,
1% – Ulttyq Olımpıada komıteti janyndaǵy qorǵa baǵyttalmaq.
«Bul halyqaralyq tájirıbelerge súıengen sharalar oıyn bıznesi salasyndaǵy ashyqtyqty, senimdilikti jáne bıýdjettik túsimderdiń tıimdiligin arttyrýǵa múmkindik beredi. ESÝ jobasy naryqty kóleńkeden shyǵaryp, biryńǵaı erejeler ornatady», dedi depýtat.
Sonymen qatar Ermurat Bapı «Operator ESÝ» jáne ózge de jobadaǵy taraptardyń sheteldik sanksııalyq uıymdarmen baılanysy týraly buryn aıtylǵan aqparattyń shyndyqqa janaspaıtynyn naqtylady.
«Men bul jobanyń iske asyrylýyn ári qaraı da muqııat baqylap, azamattarǵa resmı derekter negizinde turaqty túrde aqparat berip otyramyn. Jaqyn ýaqytta memlekettik organdardyń resmı jaýaptary da jarııalanatyn bolady», dep túıindedi Májilis depýtaty.