Álemge áıgili Brıtandyq The Guardian bıylǵy jyly 2008 jyly dúnıege kelgen eń talantty jas fýtbolshylardyń jańa tizimin usyndy. Sol bedeldi reıtıngke alǵash ret qazaqstandyq oıynshy – almatylyq «Qaırattyń» shabýylshysy Dastan Sátbaev endi, dep habarlaıdy Egemen.kz.
Basylymnyń málimetinshe, Dastan Sátbaev qazirgi tańda «Qaırattyń» eń jarqyn juldyzdarynyń biri sanalady. Ol 2024 jyldyń mamyr aıynda, nebári 15 jasynda el Premer-lıgasynda debıýt jasap, sol sátten bastap jankúıerler men sarapshylardyń nazaryn ózine aýdardy. Fýtbolshy sheshýshi matchtarda komandany alǵa jetelep, óziniń úlken potensıalyn dáleldedi.
The Guardian maqalasynda jas qazaqstandyqtyń Eýropa arenasyndaǵy jetistikteri de atap ótilgen. Sátbaev Chempıondar lıgasynyń irikteý kezeńinde Slovenııanyń «Olımpııa» klýbynyń qaqpasyna gol soǵyp, Fınlıandııanyń KýPS komandasymen kezdesýde erekshe oıynymen kózge tústi. Al Slovakııanyń «Slovanymen» ótken mańyzdy oıynda sońǵy mınýttarda penaltı oryndap, «Qaıratqa» 1:0 esebimen jeńis syılaǵan.
Brıtan basylymy sonymen qatar aǵylshyn alpaýyttary – «Chelsıdiń» jas shabýylshymen 4 mıllıon eýro kóleminde kelisimshart jasasqanyn jazady. Sarapshylardyń boljamynsha, onyń naryqtyq quny aldaǵy jyldary edáýir ósedi.
Sonymen qatar Dastannyń jyldamdyǵy, tehnıkasy men qabileti óz jasynan áldeqaıda joǵary ekeni erekshe atalǵan. 2026 jyldyń tamyz aıynda ol resmı túrde «Stemford Brıdjge» qosylyp, aǵylshyn Premer-lıgasynda óz sheberligin kórsetýge múmkindik alady.