Jambyl óńiri jańartylatyn energııa kózderin damytýda elimiz boıynsha kósh bastap tur, dep habarlaıdy Egemen.kz.
Kún men jeldiń, sýdyń tabıǵı qýatyn tıimdi paıdalaný arqyly aımaq atqaminerleri ekologııalyq taza ári turaqty energetıkalyq júıe qalyptastyrýdy maqsat etken.
Oblys ákimdiginiń energetıka jáne turǵyn úı-kommýnaldyq sharýashylyq basqarmasynyń basshysy Ǵalym Isaqovtyń aıtýynsha, óńirdiń tabıǵı jaǵdaıy balamaly energııa kózderin óndirýge erekshe qolaıly. Sol sebepti Jambyl jeri ınvestorlar nazaryn ózine kóbirek aýdaryp otyr.
Qazirgi kezde jalpy qýaty 571,3 megavatt bolatyn jıyrma eki nysan jumys istep tur. Olardyń qatarynda alty sý elektr stansııasy, on jel elektr stansııasy jáne alty kún elektr stansııasy bar.
Bıylǵy toǵyz aıdyń ózinde oblysta 602,1 mıllıon kılovatt saǵattan astam elektr energııasy óndirilgen. Sońǵy tórt jyl ishinde oblysta birneshe iri joba júzege asyryldy. Sonymen qatar qýaty 100 megavatt bolatyn «Jańatas» jel elektr stansııasy iske qosylyp, oblys energetıkasyna tyń serpin berdi. Quny 49 mıllıard teńgeni quraıtyn bul joba óńirdiń energetıkalyq táýelsizdigin nyǵaıtyp, jańa jumys oryndarynyń ashylýyna jol ashty.
2021 jyly «Tasótkel» sý qoımasyndaǵy ekinshi kezeńdi qamtyǵan sý elektr stansııasy paıdalanýǵa berilip, qosymsha 9,2 megavatt qýat kózi iske qosyldy. Kelesi kezekte Jambyl aýdanynda qýaty 50 megavatt «AEC ASA» kún elektr stansııasy iske qosyldy. Talas aýdanynda da qýaty 13,5 megavatt úsh jel stansııasy jumys isteı bastady. Bul – Shengeldi, Shengeldi-2 jáne Novateks jobalary. 2024 jyly Sarysý aýdanynda qýaty 100 megavatt Shoqpar jel elektr stansııasy tolyq iske qosyldy. О́ńirdiń tabıǵı áleýetin eskergen sheteldik kompanııalar da bul baǵytqa aıtarlyqtaı qyzyǵýshylyq tanytyp otyr. Moıynqum aýdanynda Fransııanyń «Total Eren» kompanııasy qýaty bir gıgavatt bolatyn iri jel elektr stansııasyn salýdy josparlaýda.
Joba 2028 jyly aıaqtalmaq. Sarysý men Talas aýdandarynda Birikken Arab Ámirlikteriniń «Masdar» kompanııasy dál osyndaı qýattaǵy taǵy bir jobany iske asyrýdy qolǵa alǵan. Nysan 2029 jyly paıdalanýǵa berilmek. Mundaı iri jobalar iske qosylǵan soń oblystyń jalpy jańartylatyn energııa qýaty eki jarym gıgavattqa deıin jetedi. Bul óńirdiń energetıkalyq áleýetin eselep arttyryp, Qazaqstannyń «jasyl ekonomıka» baǵytyna naqty úles qosady.
2028 jylǵa qaraı oblystaǵy JEK sany 24 nysanǵa jetip, jalpy qýaty 2,5 gıgavatt bolady dep josparlanyp otyr. Mundaı kórsetkish aımaqty energııa qýatymen qamtamasyz etip qana qoımaı, ekologııalyq turaqtylyqty da qalyptastyrýǵa úles qosady. Oblystyq energetıka basqarmasynyń basshysy Ǵalym Isaqovtyń aıtýynsha, bul jobalar óńirdiń áleýmettik damýyna da oń áser etedi. Jańa nysandar ashylǵan saıyn jergilikti halyqqa jumys oryndary kóbeıedi, aýyl ınfraqurylymy jaqsarady, al tabıǵatqa zııan meılinshe azaıady.
Jambyl oblysy