Shyǵys Qazaqstan oblysynda «Taza О́skemen» kommýnaldyq kásipornynyń burynǵy dırektory men onyń seriktesteri qala kóshelerin kútip ustaýǵa bólingen bıýdjet qarajatyn jymqyrdy degen kúdikpen ustaldy. Tergeý derekterine sáıkes, memleketke 120 mıllıon teńgeden astam zalal keltirilgen, dep habarlaıdy Egemen.kz.
Qarjylyq monıtorıng agenttiginiń ShQO boıynsha departamenti «Taza О́skemen» sharýashylyq júrgizý quqyǵyndaǵy kommýnaldyq memlekettik kásipornynyń basshylyǵyna qatysty sotqa deıingi tergep-tekserýdi júrgizip jatyr.
Kúdiktiler qatarynda kásiporynnyń burynǵy dırektory, onyń orynbasary jáne jeke kásipker bar. Tergeý nusqasy boıynsha, olar ózderiniń laýazymdyq ókilettikterin paıdalanyp, memlekettik satyp alý rásimderin ótkizbesten jáne bıýdjet qarajatyn ózderimen baılanysy bar kommersııalyq uıymdardyń esepshottaryna zańsyz aýdaryp otyrǵan.
«Qylmystyq shemanyń máni – materıaldardy jetkizý jáne tehnıkany jalǵa alý boıynsha jalǵan qujattar rásimdeýde bolǵan. Atap aıtqanda, qujattarda joldardy jóndeýge arnalǵan bıtým men qum satyp alý, sýdy sorýǵa arnalǵan arnaıy tehnıka jaldaý, sondaı-aq buǵan deıin ornatylǵan 23 aıaldama pavılonyn jasaýǵa qajetti materıaldar satyp alý týraly jalǵan derekter kórsetilgen. Keıin bul qarajat jeke kásipker arqyly qolma-qol aqshaǵa aınaldyrylyp, shemaǵa qatysýshylar arasynda bólingen», delingen habarlamada.
Tergeý materıaldaryna sáıkes, keltirilgen jalpy zalal kólemi 120 mıllıon teńgeden asyp ketken.
Kúdiktiler urlanǵan qarjyǵa О́skemen qalasyndaǵy elıtalyq turǵyn úı kesheninen páter, BMW X6M jáne Subaru Forester markaly avtokólikterin, sondaı-aq birneshe jer ýchaskesin satyp alǵan. Qazirgi ýaqytta bul múlikke sot sanksııasymen tyıym salyndy.
Kásiporynnyń burynǵy dırektoryna qatysty bultartpaý sharasy retinde eki aı merzimge qamaýǵa alý túrindegi sheshim qabyldandy.
Qarjylyq monıtorıng agenttigi tergeý jalǵasyp jatqanyn habarlady. QR Qylmystyq-prosessýaldyq kodeksiniń 201-babyna sáıkes, ózge aqparat tergeý múddesine baılanysty jarııa etilmeıdi.