Elimizde túıe sútinen qurǵaq untaq óndiretin kásiporyndar kóp emes. Osy baǵyttaǵy qýatty óndiris orny Túrkistan oblysynda ornalassa, ekinshisi Aral aýdanynda iske qosylatyn boldy. Aýdanda «Qazaq Camel» JShS-niń «Túıe sútinen qurǵaq untaq shyǵarý zaýytyn salý» jobasy aıasyndaǵy jumys qaıta jandandy.
Quny 3 mlrd teńge bolatyn joba birneshe jyl buryn bastalǵanymen, biraz ýaqyt qurylys jumystary toqtap qalǵan edi. Bıyl bastamaǵa qaıta serpin berilip, aýdan ákimi Amanjol Ońǵarbaev óndiris ornynda bolyp, joba jetekshilerimen kezdesti.
Aral tórt túliktiń tóresi sanalatyn túıe sanynan basqa aýdandardan alda tur. Qazirgi esep boıynsha aýdanda 37 myńnan astam Oısylqara tuqymy bar. Sondyqtan óndiristi dál osy aımaqta jolǵa qoıý tıimdi bolyp otyr.
Búginde zaýytqa Qytaıdan arnaıy mamandar shaqyrylyp, ónim óndirýge qajetti qurylǵylar ornatylyp jatyr. Buǵan deıin salynǵan negizgi ǵımarat janynan sútti keptirýge arnalǵan qosymsha nysan boı kóterip keledi.
Mamandar dereginshe zaýyt táýligine 20 myń lıtr túıe sútin óńdeı alady. Turǵyndardan sút qabyldaý júıesi de jolǵa qoıylǵan. Ár aýyldan jınalatyn shıkizat óndiris ornyna arnaýly tehnıkamen jetkiziledi.
Qazir zaýyt ishi – qarbalasqa toly. Mamandar qurylǵylardy tehnıkalyq talaptarǵa saı ornatyp jatyr. Aýdan ákimi joba jetekshisimen kezdesýde jergilikti bılik tarapynan óndiris ornyna qajetti qoldaý kórsetiletinin jetkizdi.
Qyzylorda oblysy,
Aral aýdany