Qonaev qalalyq kópsalaly aýrýhanasynda japondyq jetekshi mamandardyń qatysýymen operasııalyq endoskopııa jóninde halyqaralyq sheberlik dárisi ótti. Aýqymdy shara elimiz medısınasynyń damýyna, hırýrgııa salasyndaǵy halyqaralyq yntymaqtastyqty nyǵaıtýǵa zor úles boldy.
Almaty oblysy densaýlyq saqtaý basqarmasynyń basshysy Erjan Súleımenov atap ótkendeı, sheberlik sabaǵyn ótkizý – jaı ǵana tájirıbe almasý emes, halyqaralyq standarttardy otandyq tájirıbege engizýdiń naqty qadamy.
«Biz japondyq ǵylymı ortalyqpen kelisimge kelýdiń sońǵy kezeńine shyqtyq. Aldaǵy jyldan bastap Almaty oblysynyń hırýrgteri men endoskopısteri Japonııada tegin oqyp, taǵylymdamadan óte alady. Qatysý sharttarynyń biri – aǵylshyn tilin bilý. Bul jas mamandarǵa úlken yntalandyrý bolady, densaýlyq saqtaý júıesiniń kadrlyq áleýetin nyǵaıtady. Sonymen qatar otandyq dárigerler eldiń jetekshi medısınalyq mekemeleriniń biri sanalatyn Astanadaǵy Ulttyq onkologııa ortalyǵyna da oqýǵa jiberiledi. Maqsatymyz – medısınalyq kadrlardyń kásibı damýyn úzdiksiz qamtamasyz etý, ozyq tehnologııalardy qoldanysqa engizý», dedi Erjan Ábilqasymuly.
Sheberlik sabaǵyna Japonııadan kelgen eki jetekshi mamanmen qatar, elimizdiń shtattan tys bas endoskopısi, professor Qanat Batyrbekov qatysty. Endoskopııalyq operasııalardyń kórsetilimderi, oqý sessııalary, klınıkalyq jaǵdaılardy talqylaý bolyp ótti.
Japondyq mamandardyń otandyq dárigerlerdi oqytýǵa qatysýy – densaýlyq saqtaý júıesiniń damýyna qosylǵan baǵa jetpes úles. Mundaı is-sharalar dárigerlerdiń biliktiligin arttyryp qana qoımaı, medısınalyq kómektiń sapasyn strategııalyq turǵydan kúsheıtýge yqpal etedi.
Endoskopııa ortalyǵynyń meńgerýshisi, hırýrg dáriger Tahır Shkýralıevtiń aıtýynsha, japon endoskopııa mektebi joǵary tehnıkalyq dáldigimen qatar, uqypty aralasý fılosofııasymen erekshelenedi. Onyń sózinshe, Almaty oblysynyń mamandary tek tehnologııany ǵana emes, sol kózqaraspen oılaý júıesin de meńgerip jatyr. Bul – búkil endoskopııa qyzmetiniń damýyna jasalǵan mańyzdy qadam.
Otandyq endoskopııa qoǵamdyq birlestiginiń tóraǵasy, professor Qanat Batyrbekov mundaı sheberlik sabaqtaryn ótkizý salanyń ósýiniń basty kepili ekenin, dál qazirgi rejimde kórýge bolatyn operasııalar, naqty jaǵdaılardy talqylaý, halyqaralyq sarapshylarmen qarym-qatynas – munyń barlyǵy pasıentterge kórsetiletin kómektiń sapasyna tikeleı áser etetinin aıtady.
Sheberlik sabaǵynyń ekinshi kúni pasıentterge konsýltasııa berý, qosymsha hırýrgııalyq kórsetilimder, saraptamalyq pikirtalastar ótti. Osyndaı deńgeıdegi is-sharanyń Qonaev qalasynda uıymdastyrylýy otandyq mamandardyń joǵary kásibı daıarlyǵynyń, elimiz medısınasynyń halyqaralyq kásibı yntymaqtastyqqa ashyqtyǵynyń dáleli boldy.
Almaty oblysy