Qaraýsyz janýarlar jol-kólik oqıǵalaryna jıi sebep bolatyny málim. Abaı oblysynda drondar maldyń baqylaýsyz jaıylýyna baılanysty jol-kólik oqıǵalaryn azaıtýǵa kómektesip jatyr, dep jazady Egemen.kz.
Aýdan ákimdikteriniń qoldaýymen jergilikti polısııa bólimsheleri patrýldik qyzmet barysynda aýmaqty turaqty baqylaýǵa jáne avtojol mańynda erkin jaıylyp júrgen maldy jedel anyqtaýǵa múmkindik beretin drondarmen jabdyqtaldy. Joǵary ajyratymdylyqtaǵy kameralary bar pılotsyz ushý apparattary maldyń ornalasqan ornyn naqty ýaqyt rejıminde kórsetip, tez áreket etýge jaǵdaı jasaıdy.
Drondardy profılakıtıkalyq sharalarmen ushtastyrý – mal ıeleriniń jaýapkershilik mádenıetin arttyrýǵa da múmkindik berip otyr.
Ishki ister mınıstrliginiń málimetinshe, mysaly, atalǵan oblystyń Jańasemeı aýdanynda júrgizilgen profılaktıkalyq reıdter barysynda 59 bas jylqy anyqtalyp, arnaıy turaqqa jetkizilgen. Baqylaýsyz júrgen mal – Semeı-О́skemen jáne Omby-Maıqapshaǵaı baǵyttaryndaǵy qozǵalysy úlken joldarda jıi kezdesetin qaýip kózderiniń biri. Drondardy qoldaný bul táýekelderdi aıtarlyqtaı tómendetip, óńirdegi jol qaýipsizdigi deńgeıin jaqsartýǵa múmkindik berip otyr.
Statıstıka da qabyldanyp jatqan sharalardyń tıimdiligin rastap otyr: jyl bastalǵaly polıseıler maldyń baqylaýsyz jaıylýyna qatysty 2 284 quqyq buzýshylyqty anyqtaǵan. Arnaıy aıypturaqtarǵa 9 729 bas mal qoıylyp, olardyń ıeleri Ákimshilik quqyq buzýshylyq týraly kodekstiń 408-baby boıynsha jaýapkershilikke tartylǵan.
Sonymen qatar aýyl sharýashylyǵy janýarlaryn sáıkestendirý talaptarynyń buzylýyna qatysty 201 derek tirkelip, materıaldar veterınarııalyq ınspeksııaǵa joldanǵan.