Premer-mınıstr Oljas Bektenov tóraǵalyq etken keńeste elimizdiń kólik ınfraqurylymyn jańa deńgeıge kóteretin bastamalar tanystyryldy. Bul jolǵy talqylaý – jaı úkimettik esep emes, eldiń tranzıttik bolashaǵyn aıqyndaıtyn strategııalyq qadamdardyń kórinisi, dep jazady Egemen.kz.
2040 jylǵa deıin álemdik áýe naryǵy eki eselenedi degen boljam bar. Qazaqstan osy múmkindikti meılinshe tıimdi paıdalaný úshin avıasııanyń aldaǵy úsh jylǵa arnalǵan damý josparyn jańartty. ICAO aýdıti elimizdiń standarttarǵa sáıkestigin 95,7% dep baǵalap, Qazaqstandy álemdegi eń qaýipsiz avıasııalyq aımaqtardyń qataryna qosty. Bul halyqaralyq áýe tasymaly úshin mańyzdy senim kórsetkishi.
Josparǵa áýejaı ınfraqurylymyn jańartý, jańa jolaýshylar jáne júk termınaldaryn salý, marshrýttardy keńeıtý, ushaq parkin arttyrý jáne sheteldik oqý ortalyqtaryn tarta otyryp, bilikti mamandar daıarlaý kiredi. Elimizdiń eki iri qalasy – Astana men Almaty endi Ortalyq Azııadaǵy basty avıasııalyq habqa aınalýǵa baǵyt aldy. Elordada ekinshi ushý-qoný jolaǵy salynbaq, al Almaty áýejaıynda Horizon baǵdarlamasy boıynsha júk haby men servıstik ekojúıe qurylmaq.
Ishki baǵyttar da nazarda. Bıyldyń ózinde jolaýshylar sany 13 mln-nan asqan. Avıasııa salasyndaǵy árbir 100 jumys orny ózge salalarda 610 qosymsha jumys ornyn týdyratyny halyqaralyq taldaýmen dáleldengen. Bul salanyń ekonomıkalyq mýltıplıkator retindegi róli aıqyn ekenin kórsetedi.
Keńeste júk tasymalyn damytý perspektıvalary da belgilendi. Sonymen qatar Premer-mınıstr avıaotyn naryǵyndaǵy tıimsiz deldaldardy anyqtap, retteýdi tapsyrdy. Bul qadam áýe bıletteriniń baǵasyna da yqpal etýi múmkin.
Avtojol salasy da nazardan tys qalmady. Joldardyń jaǵdaıyn jaqsartý, jabyn sapasyn arttyrý, ınfraqurylymdyq jobalardy júıeli ári jaýapkershilikpen oryndaý mindetteldi.
Qazaqstan osylaısha kólik júıesin jańasha quryp, eldiń tranzıttik áleýetin kúsheıtetin sheshimder qabyldaýǵa kiristi. Eki megapolıstiń áýejaılary jańa tynys alyp, respýblıka aımaqtarynyń ózara baılanysy burynǵydan da nyǵaıa túspek.