Qazaqstandyq MMA juldyzy Shavkat Rahmonov (19-0) UFC-diń jartylaı orta salmaqtaǵy jańa chempıony, reseılik Islam Mahachevpen (28-1) tıtýldyq jekpe-jek ótkizýge daıyn ekenin aıtty, dep habarlaıdy Egemen.kz.
15 qarashada Nıý-Iorkte ótken UFC 322 týrnırinde Mahachev avstralııalyq Djek Della Maddalenany tóreshilerdiń bir aýyzdan shyǵarǵan sheshimimen jeńip, jańa chempıon atanǵan edi. Sonymen qatar, ol uıymnyń rekordyn qaıtalap, jeńister serııasyn 16 jekpe-jekke jetkizdi.
Shavkat Rahmonov The Ariel Helwani Show baǵdarlamasynda aldaǵy jekpe-jekke qatysty oıyn bólisti.
«Eger bári meniń qolymda bolsa, tıtýl úshin aıqasýdy tańdar edim. Biraq Islamnyń aqpannyń sońy – naýryzǵa úlgerýi ekitalaı dep oılaımyn. Ol, shamasy, sáýirdiń sońy – mamyrdyń basynda daıyn bolady. UFC-ge de baılanysty. Qalaı bolǵanda da, men Islammen shyǵýǵa daıynmyn, esh qıyndyq joq.
UFC maǵan tıtýldyq jekpe-jek ýáde etken, biraq jaraqat alyp, rıngke shyǵa almadym. Bul – salmaqty sebep. Eger UFC meniń aldymen bireýmen aıqasqanymdy qalasa, qarsylyǵym joq, kim bolsa da daıynmyn. Eń bastysy – merzim. Sol kúnge men tolyqtaı babymda bolamyn», dedi faıter.
Eske sala keteıik, Rahmonov ótken jyldyń jeltoqsanynda chempıondyq belbeý úshin Belal Muhammedpen aıqasýy tıis bolǵan. Biraq Belal jaraqat alyp, jekpe-jek keıinge qaldy. Mamyr aıyna josparlanǵan revanshta Shavkattyń ózi jaraqatyna baılanysty qatysa almady.
Al mamyrda Rahmonovtyń ornyn basqan Djek Della Maddalena óz múmkindigin tıimdi paıdalanǵan edi, ol Belaldy jeńip, UFC chempıony atandy.