Aýstralııanyń Sıdneı qalasyndaǵy Crown kazınosynda Qazaqstannan barǵan erli-zaıypty jandar jasyryn kamera men qulaqqaptardy paıdalanyp, 1,18 mln AQSh dollaryn ıemdendi degen kúdikpen ustaldy, dep habarlaıdy Egemen.kz.
Guardian basylymyna New South Wales polısııasynyń málimetinshe, 36 jastaǵy Dılnoza Israılova men 44 jastaǵy Alısherıhoja Israılov «alaıaqtyq jolmen qarjylyq artyqshylyq alý» baby boıynsha aıyptalyp, Barangaroo aýdanyndaǵy kazıno aýmaǵynda qamaýǵa alynǵan.
Beısenbi kúni kazıno qyzmetkerleri áıeldiń ústindegi Mickey Mouse beınesi bar jeıdege bekitilgen shaǵyn qupııa kamerany baıqap qalǵan.
«Kazıno qyzmetkerleri polısııaǵa habar berdi. Oqıǵa ornyna kelgen ofıserler áıel men onyń 44 jastaǵy kúıeýin ustady», delingen polısııanyń málimdemesinde.
Tergeý barysynda erli-zaıyptylardan magnıttelgen shaǵyn zondtar, batareıalar jáne kamera qyzmetin jasyryn atqarýǵa múmkindik beretin qosymsha qurylǵysy bar telefon, sondaı-aq arnaıy jasalǵan aına-tirkeme tárkilengen.
Polısııa olardyń 2025 jyldyń qazan aıynda Qazaqstannan Sıdneıge kelgenin, sol kúni-aq Crown músheligine tirkelýge ótinish bergenin habarlady.
Qazan men qarasha aılary aralyǵynda olar kazınoǵa birneshe ret baryp, jalpy 1,18 mln dollar utyp, qaýipsizdik qyzmetiniń kúdigin týdyrǵan.
«Mobıldi telefondar arqyly ústeldegi oıyn kartalaryn jasyryn túsirip, olar tereń ornalasqan qulaqqaptar arqyly syrttan nusqaý alyp otyrǵan. Osylaısha kartalyq oıyndarda aldap jeńiske jetken», dep málimdedi NSW polısııasy.
Polısııa Kent Street kóshesindegi olardyń jalǵa alǵan páterin tintý kezinde túrli oıyn quraldary, baǵaly áshekeıler jáne 2 000 eýro tapqan.
Erli-zaıypty jup juma kúni jergilikti sotqa jetkizildi. Olar kepilge bosatýdy suramaǵan, sot kepildi avtomatty túrde qabyldamady.
Dılnoza Israılovanyń isi aqpanda qaralady. Al Alısherıhoja Israılov 11 jeltoqsanda Downing Centre sotyna shyǵýy tıis.
Uıymdasqan qylmysqa qarsy kúres basqarmasynyń basshysy Pıter Fo málimdegendeı, polısııa men kazıno qaýipsizdik qyzmetiniń úılesimdi jumysy mundaı quqyq buzýshylyqtardy anyqtaýǵa múmkindik beredi.
«Bizdiń detektıvter kazınonyń qaýipsizdik qyzmetimen tyǵyz jumys isteıdi. Mundaı seriktestik oıyn ındýstrııasynyń tazalyǵyn qamtamasyz etý úshin óte mańyzdy», dedi ol.