Keńes odaǵynyń batyry, jaýynger jazýshy, túgel qazaqtyń maqtanyshyna aınalǵan Baýyrjan Momyshulynyń týǵanyna bıyl 115 jyl tolyp otyr. Osyǵan oraı Tarazda «Baýyrjan Momyshuly muralary: tarıh pen tanym» taqyrybynda respýblıkalyq ǵylymı-tájirıbelik konferensııa ótti.
Is-sharada alǵash sóz alǵan óńir basshysynyń birinshi orynbasary Nurjan Kalenderov dańqty tulǵanyń soǵys dalasyndaǵy erligi men beıbit kúndegi qaıratkerlik qyry qaı kezde de ult pen urpaq jadynan óshpeıtinin tilge tıek etti.
«Er Baýkeńniń ór minezi týraly estelik az aıtylmaıdy. Ol kisiniń batyrlyǵyn, maıdan dalasyndaǵy tapqyrlyǵyn zamandastary laıyqty baǵalaǵany da málim. Baýkeńniń qalamgerlik qyry da bir tóbe ekeni belgili. Tutas qazaqtyń maqtanyshyna aınalǵan taý tulǵanyń esimi qazaq halqymen birge jasaıtynyna eshkimniń kúmáni joq.
О́ńirimizde 3 eldi meken, 45 kóshe, 7 mektep jáne saıabaq pen mýzeı Baýyrjan Momyshulynyń esimimen atalady. Tarlan-boz tulǵanyń esimi birneshe bilim ordasyna berilýi – ult qaharmanyna degen qurmettiń belgisi. Batyrdyń erligi men órligin, ózine ǵana tán dara jolyn qansha dáriptesek te artyqtyq etpeıdi», dedi N.Kalenderov óz oıymen bólisip.
Qazaqstannyń eńbek sińirgen qaıratkeri Orynsha Qarabalınanyń sózi aıryqsha tolǵanysqa toly bolǵany sózsiz.
«1952 jyly ýnıversıtetti bitirip, muǵalim mamandyǵy boıynsha jumysqa ornalastym. Al meniń júregimdi jaýlaǵan azamat, batyr týǵan inisindeı qurmetteıtin Kákimjan Qazybaev respýblıkalyq «Lenınshil jas» gazetine jumysqa qabyldandy. Ol gazette qazir biz ardaqtap otyrǵan batyr atamyzdyń jary da jumys istedi. Batyrdyń erligi men ónegeli isteri týraly biz eń alǵash jarynan estip bildik.
1956 jyly Baýyrjan Momyshuly atamyz áskerı qyzmetin birjolata aıaqtap, Almatyǵa oraldy. Sol jyly Kákimjan ekeýmiz shańyraq kóterdik. Baýkeń atanyń úıine júreksine bardym. Ol jas otaý bolǵanymyzǵa qýanyp, quttyqtap, erekshe peıilin kórsetti. Sol úıde biraz birge turdyq. Batyrdyń úıine qonaq óte kóp keletin. Úıdiń esigi únemi ashyq turady. Qonaqtardyń barlyǵyn birinshi qarsy alyp, batyrdyń bólmesine ertip aparatyn edim.
Keńes odaǵynyń batyry Málik Ǵabdýllın Baýkeńe amandasýǵa keletin-di. General Panfılovtyń qyzy Valıa da jıi keletin. Ol qyzǵa atamyz erekshe qurmet kórsetetin. Kúıeýim Kákimjan Qazybaev batyrdyń «Ofıser kúndeligi» atty uzaq eńbegin orys tilinen qazaqshaǵa aýdardy. Ol jazba «Lenınshil jas» gazetiniń birneshe nómirinde jarııalandy. «Lenınshil jas» gazetiniń ujymymen áıgili batyr tonnyń ishki baýyndaı aralasty. Ondaǵy jýrnalıster Baýkeń batyrdyń inisindeı bolyp ketti. Ol kisiniń maıdan týraly, soǵys zardaby týraly áńgimeleri óte áserli bolatyn.
Batyr atamyz Rahymjan Qoshqarbaevty erekshe qurmettedi. Ony kózimiz kórdi. Batyrdyń rýhyna arnalǵan osynaý konferensııany ótkizgen oblys ákimdigine, jambyldyq zııaly qaýymǵa, jınalǵan kópshilikke sheksiz alǵysymdy bildiremin», dedi ol.
Is-sharaǵa qatysqan generaldar Seıtjan Qoıbaqov pen Nurjan Jigitekov te izgi tilekterin aıtty. S. Qoıbaqovtyń aıtýynsha, aty ańyzǵa aınalǵan tulǵanyń 115 jyldyǵyna oraı «Batyrdyń altyn besigi – Jýaly» degen kitap jazypty.
Jıynǵa jınalǵan mártebeli meımandardyń barlyǵy dańqty tulǵanyń bolmysy, kisiligi, erligi týraly esti esteligimen bólisti. Is-shara sońynda mektep oqýshylary men oblystyq fılarmonııanyń ánshileri ánnen shashý shashty.
Taraz