Astana Hub qatysýshysy 4sell.ai startapy kompanııany 4 mln dollarǵa baǵalaý kezinde 400 myń dollar somasynda ınvestısııa alyp otyr. Investısııalyq raýndqa MA7 Ventures, MOST Accelerator Fund, Axiom Capital qatysty, dep habarlaıdy Egemen.kz.
4sell.ai – álemde balamasy joq AI-platforma. Ol servıstiń sapasy men klıent tájirıbesin ólsheýge múmkindik beredi. Startapty qaraǵandylyq synyptastar – Roman Belopolskıı jáne Konstantın Balzın qurǵan.
Júıe qyzmetkerlerdiń qurylǵylarynda tikeleı jumys isteıdi: kassalarda, koll-ortalyqtarda jáne daıashylardyń termınaldarynda. Servıs bızneske qosymsha satylymdardy arttyrý arqyly tabys ósirýge, real-time keńesterdiń kómegimen qatelerdi azaıtýǵa, personaldy tıimdi oqytýǵa jáne qupııa satyp alýshylarsyz – ár fılıal men qyzmetker boıynsha kún saıyn ashyq analıtıka alýǵa múmkindik beredi.
«Ortasha chek kóleminiń nebári 8%-ǵa ósýi 50 kafe jelisine jylyna 1 mln dollar qosymsha tabys ákelýi múmkin», deıdi 4sell.ai kompanııasynyń bas dırektory Roman Belopolskıı.
Astana Hub málimetinshe, qyzmetkerler standarttardy oryndaǵany úshin lezde bonýs alady – geımıfıkasııa servıs sapasyn baqylaýdy motıvasııa men ósýdiń quralyna aınaldyrady. Motıvasııa men geımıfıkasııa engizilgen soń, klıent jelilerindegi qosymsha satylymdardyń úlesi orta eseppen +8%-ǵa, al jekelegen qyzmetkerlerde 16-19%-ǵa jetken. Hani jelisindegi alǵashqy engizýler ortasha chek pen personal belsendiliginiń artqanyn kórsetip otyr. Klıentter qatarynda HoReCa naryǵynyń jetekshileri – SF, Zebra Coffee, Coffee Hub, sondaı-aq alǵashqy dárihana jelisi Biopharma bar. Qazirgi klıentterdiń jalpy fılıal sany 200-den asady.
Tartylǵan qarjy platformany damytý men engizý qarqynyn kúsheıtýge baǵyttalady: daıashylarǵa arnalǵan jańa qosymsha, self-service fýnksııalary, jetildirilgen geımıfıkasııa, sondaı-aq sóıleý analıziniń dáldigin arttyrý jáne edge-analız formatyna kóshýge arnalǵan R&D jasalady.
2026 jyly 4sell.ai 1000 nysanǵa deıin aýqymyn keńeıtýdi, ózin-ózi aqtaý deńgeıine jetýdi jáne AQSh naryǵyna shyǵýǵa daıyndyqty josparlap otyr.
Roman Belopolskııdiń aıtýynsha, MOST Accelerator Fund baǵdarlamasy damý men fandreızıngke degen kózqarasty qaıta qaraýǵa kómektesken.
«Biz ınvestorlarmen durys qarym-qatynas qurýdy úırendik jáne komandaǵa artyq qateliksiz ósýge kómektesetin advaızer taptyq. Aýqymdy keńeıtýge alǵashqy serpin Qaraǵandydaǵy Murat Ábdirahmanovtyń venchýrlyq oılaý týraly dárisi boldy. Sol dáristen keıin biz ónimge jańasha qarap, alǵash ret halyqaralyq naryq týraly oılaı bastadyq. Bul sharany uıymdastyrǵan Terricon Venture jetekshisi Marııa Jırkovaǵa alǵys aıtamyz», deıdi Roman Belopolskıı.
Aıta ketelik, MOST Accelerator Fund – Ortalyq Azııadaǵy AI B2B startaptaryn qoldaıtyn, kólemi 10 mln dollardy quraıtyn venchýrlyq qor-akselerator. Qor portfelinde 10 komanda bar, olardyń barlyǵy qatań irikteýden ótken jáne halyqaralyq naryqqa shyǵý áleýetin kórsetedi.
MA7 Ventures – Ortalyq Azııadaǵy eń iri kásipker Murat Ábdirahmanov negizin qalaǵan venchýrlyq ekojúıe. Portfelde 60-tan astam joba bar, ınvestısııalar kólemi 25 mln dollardan asady. Bul – aımaqtaǵy alǵashqy paıda ákeletin venchýrlyq ekojúıe.
Axiom Capital – korporatıvtik B2B-baǵdarlamalyq qamtý salasyndaǵy kompanııalarǵa mamandanǵan venchýrlyq qor.