Ulytaý oblysynyń Keńgir aýylynda kógildir otyndy resmı iske qosý rásimi ótti. Atalǵan mańyzdy ınfraqurylymdyq joba nátıjesinde eldi mekendegi 442 turǵyn úı men jeti áleýmettik nysan tabıǵı gazǵa qosylý múmkindigine ıe boldy. Uzyndyǵy 25 shaqyrymdy quraıtyn gaz taratý jelileriniń qurylysy bıylǵy sáýir aıynda bastalyp, qysqa merzimde tolyq aıaqtaldy, dep habarlaıdy Egemen.kz.
Sonymen qatar, Keńgir aýyly turǵyndaryna Esqula jer asty sý kózinen taza aýyz sý berildi.
Ulytaý oblysynyń ákimi Dastan Ryspekov jergilikti halyqty qýanyshty jańalyqpen quttyqtap:
«Qazirgi ýaqytta gazdandyrý jobasy aıasynda Jezqazǵan jáne Qarajal qalalarynda, sondaı-aq Atasý men Jáırem kentterinde qurylys-montajdaý jumystary júrgizilip jatyr. Al Ulytaý aýyly, Jezdi kenti jáne Sátbaev qalasy boıynsha jobalyq-smetalyq qujattamalar memlekettik saraptamaǵa engizildi. Kógildir otyn óńirimizdegi ekologııalyq ahýaldy jaqsartyp, turǵyndardyń ómir súrý sapasyn arttyrýǵa múmkindik beredi», dep atap ótti oblys ákimi.
Ulytaý oblysynda 2030 jylǵa deıingi óńirlik shema sheńberinde toǵyz eldi mekendi tabıǵı gazben qamtamasyz etý josparlanǵan.
Jaqynda Úkimettiń qoldaýymen Qarajal qalasy men Jáırem kentin gazdandyrýǵa qosymsha 2,4 mlrd. teńge bólindi.
Josparlanǵan ınfraqurylymdyq jobalardyń júzege asýy turǵyndardyń ómir súrý sapasyn arttyryp qana qoımaı, óńirdiń áleýmettik-ekonomıkalyq damýyna serpin beredi.
Ulytaý oblysy