Dúnıeniń basy – saıran, aıaǵy – oıran. Taýdaı tulǵalaryn baqıǵa jóneltken halqymyz jylan jylyn jylap aıaqtap otyr. Kúni keshe Qazaqstannyń Eńbek Eri, Halyq ártisi Asanáli Áshimovti jer qoınyna tapsyrdyq. О́tkenge salaýat aıtyp, 2025 jyly marqum bolǵan ardaqtylardy eske túsireıik.
Jyl basynda qazaq halqy Muhtar Maǵaýınnen aıyrylyp qaldy. 84 jasyna deıin qalamyn tastamaǵan, qazaq ádebıetiniń kókjıegin keńeıtken klassık jazýshy.
Ile-shala abaıtaný ǵylymynyń kórnekti ókili, hakimniń shyǵystyq dúnıetanymyn zerttegen Mekemtas Myrzahmetuly dúnıeden ozdy. Ǵasyr júrek ǵalymnyń 94 jasyna qaraǵan shaǵynda toqtady.
21 aqpanda Dýlat Isabekov kóz jumdy. Onyń «Ápke», «Qarǵyn», «Gaýhartas» syndy shyǵarmalary qazaq prozasyna jańa lep ákelgen edi.
Sáýir aıynda kórnekti ǵalym, folklortanýshy, akademık Seıit Qasqabasov qaıtys boldy. Ol aýyz ádebıet janrǵa jiktep, ǵylymı júıesin jasady.
Qazaq prozasy men dramatýrgııasyna eresen eńbek sińirgen Ákim Tarazıdeı alyp báıterek te qulady.
Mamyrda kók túrikter sarynyn qaıta jańǵyrtqan aqyn Temirhan Medetbek 79 jasynda baqılyq boldy. Ol qazaq poezııasyna baǵzy rýh pen ilki formany ákeldi.
68 jasynda Qazaqstannyń eńbek sińirgen qaıratkeri akter Qaırat Kemalov uly saparǵa attandy. Kópshilik ony «Qazaq handyǵy» teleserıalyndaǵy Kereı han obrazymen jaqsy tanydy.
4 tamyzda ǵaryshker Talǵat Musabaev 74 jasynda ómirden ótti. Ol ǵaryshqa úsh márte ushqan qazaq bolatyn.
Poezııa, dramatýrgııa, mýzyka salasyna orasan eńbek etken Israıl Saparbaı da bu dúnıemen qosh aıtysty. Halyq ony «Men qazaq qyzdaryna qaıran qalam» óleńimen birden tanıtyn.
Sonymen qatar qazaq halqy aqyn Kúlásh Ahmetovamen, aktrısa Dárıǵa Tilendıevamen, ádebıettanýshy Maqsat Táj-Murat jáne ádebıet synshysy, ssenarıst, rejısser Ǵalym Doskenmen qosh aıtysty.
Uly tulǵalardyń taýdaı amanaty endi keler urpaqqa mıras bolǵaı.