2026 jyldyń 1 qańtarynan bastap elimizde Biryńǵaı medısınalyq kómek paketin kezeń-kezeńimen engizý bastalady. Úzdik halyqaralyq tájirbıelerdi negizge ala otyryp bólingen medısınalyq kómek paketinde tegin medısınalyq kómektiń kepildik berilgen kólemi men (TMKKK) mindetti áleýmettik medısınalyq saqtandyrý qyzmetiniń (MÁMS) arajigi naqtylanǵan. Sondaı-aq atalǵan júıelerdiń sheńberinde kórsetiletin medısınalyq kómektiń qaıtalanbaýy nazarǵa alynady. Bul týraly densaýlyq saqtaý vıse-mınıstri Álııa Rústemova brıfıng barysynda málimdedi, dep jazady Egemen.kz.
Biryńǵaı medısınalyq kómek paketi sheńberinde MÁMS júıesindegi mártebesine qaramastan onkologııalyq aýrýlardy, arterıaldy gıpertenzııany, ıshemııalyq júrek aýrýyn, glaýkoma jáne qant dıabetin erte anyqtaýǵa arnalǵan skrınıngter barlyq azamat úshin qoljetimdi bolmaq. Jańa jyldan bastap qazirgi 13 áleýmettik mańyzdy aýrýlardyń tiziminen tórt aýrý túri MÁMS júıesine kóshedi. Olardyń arasynda qant dıabeti, balalar serebraldy sal aýrýy, tinderdiń júıelik zaqymdanýy jáne revmatızm bar. Buǵan deıin osy aýrýǵa shaldyqqan naýqastardyń dıagnozyn anyqtaý ǵana tegin bolǵan. Jańa júıe boıynsha aýrýdy odan ári zertteý, em taǵaıyndaý tolyq MÁMS qoldaýymen aqysyz negizde júrgiziledi.
Búginde elimizdegi 16,9 mıllıon adam saqtandyrylǵan, bul el halqynyń 82,6%-yn quraıdy. Olardyń ishinde shamamen 12 mıllıon adam memleket tarapynan tólenetin jeńildik sanattaryna enedi. Al shamamen 3,4 mln adam MÁMS júıesinen tys qalyp otyr. Densaýlyq saqtaý mınıstrligi elimizde medısınalyq saqtandyrý júıesine qosylǵan azamattar qataryn qalyńdatý maqsatynda keler jyly taǵy 1 mıllıon adamdy MÁMS-pen qamtý úshin áleýmettik osal topqa jatatyn azamattardyń jarnasyn jergilikti bılikke júkteıdi. Jarnaǵa tólenetin somany ár óńir ortasha jalaqyǵa qaraı esepteıdi.
Al jumysqa qabiletti azamattar aıyna 4 250 teńge nemese jylyna 51 000 teńge tólep, MÁMS sheńberinde usynylatyn medısınalyq qyzmetterdi tegin ala alady.
MÁMS: jarnalar men aýdarymdar bazasynyń joǵarǵy shegi kóterilediKeler jyldyń qańtarynan MÁMS júıesin reformalaý aıasynda júıedegi jarnalar men aýdarymdardy esepteý tártibine de mańyzdy ózgeris engizilmek. MÁMS júıesiniń qarjylyq turaqtylyǵyn nyǵaıtý úshin jańa jyldan bastap jarnalar men aýdarymdardy esepteý bazasynyń joǵarǵy shegi kóteriledi. Joǵarǵy shek qyzmetkerler úshin – 20 AEK deıingi soma bolsa, jumys berýshiler úshin – 40 AEK bolyp belgilenip otyr. Dese de vıse-mınıstr qyzmetkerler men jumys berýshilerdiń jarna mólsherlemeleri ózgermeıtinin, tek jarnalardy esepteıtin tabystyń joǵarǵy shegi ósetinin atap ótti.
«О́zgerister shekteýli topty qamtıdy. Jarnalardy arttyrý shamamen 3,4 mln teńgeden joǵary tabysy bar 20 myń qyzmetkerge ǵana qatysty. Bul eldegi barlyq jaldamaly qyzmetkerdiń 0,3%-yn quraıdy. Qyzmetkerlerdiń 91%-y úshin jaǵdaı ózgerissiz qalady», dep túsindirdi Álııa Rústemova.
Qabyldanǵan sheshimder nátıjesinde júıege jyl saıyn shamamen 200 mıllıard teńge kóleminde qosymsha qarjy resýrsy túsedi.
«Saqtandyrylǵan» mártebesi 6 aıǵa uzartylady2026 jyldan bastap MÁMS jarnalaryn úzdiksiz 5 jyl tólep, jarnany ýaqytsha tóleý múmkindigi bolmaı qalǵan tulǵaǵa 6 aı boıy tegin medısınalyq kómek kórsetiledi. Buǵan deıin bul merzim 3 aı kóleminde bolǵan edi.
«Bul shara halyqty MÁMS júıesimen barynsha qamtýdy jáne ýaqytsha qarjylyq qıyndyqqa tap bolǵan azamattardy qoldaýǵa arnalǵan. Al 6 aıdan keıin saqtandyrylǵan mártebesinen aırylmaý úshin joǵaryda atap ótkenimizdeı aıyna 4250 teńge nemese 1 jyl úshin 51 000 teńge tóleýi tıis», dedi densaýlyq saqtaý vıse-mınıstri Álııa Rústemova.