Úkimet qyzmetiniń 2025 jyldaǵy qorytyndysyn shyǵarý sheńberinde Premer-mınıstrdiń orynbasary – jasandy ıntellekt jáne sıfrlyq damý mınıstri Jaslan Mádıev salany damytýǵa qatysty baspasóz máslıhatyn ótkizdi. Búginde elimiz jasandy ıntellektini aýqymdy engizý jáne sıfrlyq ekonomıkanyń negizgi kórsetkishteriniń turaqty ósýin qamtamasyz etý arqyly jetekshi sıfrlyq derjava mártebesin nyǵaıtyp keledi, dep jazady Egemen.kz.
Jaslan Mádıev jyl qorytyndysy boıynsha elimiz halyqaralyq reıtıngterdegi pozısııasyn nyǵaıtqanyn, JI damýynyń ınstıtýsıonaldyq negizin qalyptastyrǵanyn, alem.cloud ulttyq sýperkompıýterlik klasterin iske qosqanyn jáne memlekettik qyzmetterge, ekonomıkaǵa jáne áleýmettik salaǵa sıfrlyq jáne JI sheshimderin aýqymdy engizýdi qamtamasyz etkenin atap ótti.
Halyqaralyq baǵalaýlarǵa sáıkes, búgingi tańda Qazaqstan elektrondyq úkimettiń damý ındeksinde (EGDI) 24-shi orynda jáne onlaın-qyzmetter ındeksi (OSI) boıynsha álemniń top-10 eline kiredi. Sonymen qatar alem.cloud ulttyq sýperkompıýterlik klasteri álemdegi eń iri sýperkompıýterlerdiń TOP-500 reıtıngine enip, 86-shy orynǵa ıe boldy. Osylaısha, Qazaqstan esepteý qýaty boıynsha óńir kóshbasshylarynyń biri retindegi mártebesin rastady.
«Bul ustanymdar sıfrlyq jetilý deńgeıin ǵana emes, sonymen qatar memlekettiń basqarý tájirıbesine jasandy ıntellektini aýqymdy túrde engize alý qabiletin de kórsetedi», dedi Jaslan Mádıev.