Atyraý oblysynda zamanaýı agrologıstıkalyq ınfraqurylymdy damytýǵa baǵyttalǵan mańyzdy joba – ITC WEST logıstıkalyq ortalyǵy óz jumysyn bastady. Ashylý saltanatyna oblys ákiminiń orynbasary Marat Mýrzıev qatysyp, ujymdy quttyqtady, dep jazady Egemen.kz.
Kókónis saqtaý qoımasynyń jalpy aýmaǵy 8 200 sharshy metrdi quraıdy, munda 28 saqtaý kamerasy ornalasqan. Temperatýralyq rejım –25 °C-tan +25 °C-qa deıin retteledi. Sonymen qatar temperatýra men ylǵaldylyqty avtomatty baqylaý júıeleri, zamanaýı tońazytqysh qondyrǵylar, jeldetý jáne mıkroklımatty basqarý júıeleri ornatylǵan. Energııany únemdeıtin ınjenerlik sheshimder nysannyń úzdiksiz ári únemdi jumys isteýin qamtamasyz etedi.
«Eki jyl buryn oblys turǵyndary úshin negizgi azyq-túlik ónimderiniń baǵasyn tómendetýge baǵyttalǵan logıstıkalyq ortalyqtyń qurylysy bastaldy. A sanatyndaǵy qoımalar men temirjol tarmaǵy salyndy, bul ónimniń ózindik qunyn azaıtýǵa múmkindik beredi. Memleket pen oblystyq ákimdiktiń qoldaýymen 15,5 myń tonnaǵa arnalǵan kókónis saqtaý qoımasy boı kóterdi. Ortalyqta Batys Qazaqstandaǵy biregeı banannyń pisip-jetilýin qamtamasyz etetin kamerasy iske qosyldy. Tutynýshylardan túsken suranysqa qaraı banandardy kezeń-kezeńimen pisirip, naryqqa shyǵarý múmkindigi bar», dedi ortalyq basshysy Baýyrjan Jolmuhanov.
Logıstıkalyq ortalyqtyń jalpy aýmaǵy 30 gektardy quraıdy. Nysan qolaıly jerde ornalasqan, 5 temirjol tarmaǵy, konteınerlik alań, ózindik avtopark, A sanatyndaǵy qoımalar (5 400 m²), óndiristik keshender jáne kókónis saqtaý qoımasynan turady.