AQSh-tyń jetekshi Dıýk ýnıversıtetiniń gazeti 1957 jyly qazaq folklory týraly jaryq kórgen kitap haqynda aqparat jarııalaǵan. Sol kezde ártúrli baspalardan jaryq kórgen tarıh, ádebıet, óner, ǵylym týraly kitaptardy stýdentterge, oqyrmandarǵa tanystyrýdy maqsat etken bul basylym bizdiń el tarıhy men mádenıetin amerıkalyq oqyrmandarǵa sonaý erteden nasıhattaı bastaǵan. Mátinde ǵasyrlar boıy qazaq taıpalary Ortalyq Azııanyń ulan-ǵaıyr dalasyn mekendep kelgenin aıtady. Sonymen birge jylqy ósirýmen aınalysyp, jaýynger ári erkindikke qushtar bul kóshpeli halyq baı ári salystyrmaly túrde kúrdeli aýyz ádebıeti dástúriniń ıeleri ekenin jazady.
«Qazaqtardyń batyrlyq eposy kóne grek epıkalyq jyrlarymen jáne ortaǵasyrlyq Eýropa sagalarymen úndes keletin tustary bolǵanymen, mazmuny jaǵynan baı, júıeli ári tól týyndy sanalady. XIX ǵasyrda olar Reseı ımperııasynyń quramyna engennen bastap, Batys mádenıetimen tyǵyz qarym-qatynasqa túsýge májbúr boldy. Sol shaqta otarlyq ústemdikke qarsy qazaqtardyń narazylyǵy jańa ulttyq ádebıetten kórinis tapty. Bul shyǵarmalar kórkemdik deńgeıi men qarsylyq rýhy turǵysynan jańa deńgeıge kóterildi. Dál osy kezeń – qazaq ádebıetiniń gúldený dáýiri» delingen aqparatta.
Basylymda aıtylǵan kitap – AQSh professory Tomas Ýınnerdiń «Qazaqtyń folklory men ádebıeti» atty týyndysy. XIX ǵasyrdy qamtıdy. Avtor osy eńbegi úshin jyldar boıy ǵylymı zertteý jasaǵanyn bilemiz. (T.Ýınner eńbegi týraly K.Esmaǵambetov, B.Omarov, A.Shárip syndy ǵalymdardyń maqalalary bar. – Red.) Paıymdaýynsha, keńestik kezeńdegi qazaq ádebıetiniń eń ozyq úlgileri ulttyq ádebı muradan sýsyndap, jańa zamannyń mazmunyn jetkize alǵan qalamgerlerdiń shyǵarmalarynda kórinis tapty. Al eń sátsiz týyndylar – Batysqa nemese keńestik úlgilerge kózsiz eliktep, nátıjesinde, qazaqy nemese batystyq úlgide jazylmaǵan jasandy shyǵarmalar ekeni anyq.
Ýnıversıtet gazeti jarııalaǵan aqparatta atalǵan kitap týraly túıindi paıym da joq emes. «Búginde álemniń kóptegen baǵynyshty nemese jartylaı baǵynyshty halyqtary óz bolmysyn qaıta jańǵyrtýǵa umtylǵan tusta, oıly qaýym jas ulttardyń mádenı turǵyda saqtalýy men damýy máselesine aıryqsha mán berýde. Qazaqstan mysalynda Batys mádenıeti men ındýstrııalanǵan qazirgi qoǵamnyń bir ultqa tıgizgen yqpalyn taldaı otyryp, doktor Ýınner osy asa mańyzdy túıtkilge tereńirek úńilýge múmkindik beredi». Qalaı desek te, 70 jyl buryn jazylǵan bul kitap pen aqparat bizdiń mádenıetimiz ben ádebıetimizdiń Batys jurtyna tanylýyna septigin tıgizdi dep baǵalaımyz.