Reseı tennıs federasııasy (RTF) Elına Avanesıanǵa qatysty istiń nátıjesi boıynsha Ulttyq sporttyq arbıtraj ortalyǵynyń (USAO) sheshimin jarııalady, dep jazady Egemen.kz.
2024 jyldan beri Armenııa namysyn qorǵap júrgen sportshyǵa azamattyǵyn aýystyrýyna baılanysty qarjylyq talap qoıyldy.
RTF resmı saıtyndaǵy málimetke sáıkes, 9 jeltoqsanda USAO Reseı tennıs federasııasy men Elına Avanesıan arasyndaǵy sporttyq daıyndyq týraly kelisimsharttyń oryndalmaýyna baılanysty keltirilgen shyǵyndardy óteý jónindegi isti qaraǵan.
Sheshimge saı, 23 jastaǵy tennısshi RTF-ǵa keltirilgen zalaldy óteýge mindetteldi. О́teletin soma Ulttyq sporttyq tórelik soty tarapynan aıqyndalady. Sonymen qatar sportshy týrnırlerdegi nátıjelerinen túsken tabystan ótemaqy tóleýi jáne ózge de shyǵyndardy óteýi tıis.
Aıta keteıik, Elına Avanesıan WTA serııasyndaǵy bir týrnırdiń fınalısi atanǵan. Onyń álemdik reıtıngtegi eń joǵary kórsetkishi – bıyl naýryz aıynda tirkelgen 36-oryn.