Almaty qalasynyń bıligi jol qozǵalysyn baqylaý kameralary qyzmetin kórsetetin jetkizýshini aýystyrmaý jóninde sheshim qabyldady. «Sergek» júıesi qalada jyl sońyna deıin jumysyn jalǵastyrady, dep habarlaıdy Egemen.kz.
Almaty máslıhatynyń otyrysynda qalalyq sıfrlandyrý basqarmasy basshysynyń orynbasary Meıram Dúısekov baıandama jasady. Onyń aıtýynsha, «Sergek» júıesiniń jetkizýshisi – «Kórkem Telekom» JShS-men kelisimshart 2017 jyly jasalǵan. Memleket qabyldaǵan mindettemelerdiń jalpy somasy 9,9 mlrd teńgeni qurady.
Búginde qalada 1 641 beınebaqylaý kesheni jumys istep tur.
Sonymen qatar, 2025 jyly «Kórkem Telekom» JShS-men jasalǵan kelisimsharttyń merzimi aıaqtalýy tıis bolǵan. Osyǵan baılanysty ótken jyldyń qazan aıynda qala bıligi jańa kamera jetkizýshisin tańdaý úshin jumys tobyn qurǵan. Úmitkerler qatarynda Presight, Infodata, «Baılanys» jáne basqa da kompanııalar bolǵan. Taldaý 2 aı boıy júrgizilgenimen, jumys toby naqty sheshimge kele almaǵan. Nátıjesinde «Sergek» júıesin 2025 jyldyń 31 jeltoqsanyna deıin qaldyrý usynyldy.
Sondaı-aq jeke seriktes esebinen keshender sanyn arttyrý usynyldy: qala qajettilikterine sáıkes qosymsha 350 «Sergek» apparattyq-baǵdarlamalyq keshenin ornatý josparlanyp otyr. Bul rette qyzmet kórsetý tarıfterin kóterý kózdelmegen.
Almatyda «Sergek» júıesin saqtap qalýdy máslıhat depýtaty Almashan Smatlaev qoldady.
«Bul – qala úshin asa mańyzdy joba. Kem degende 1 jylǵa uzartýdy qoldaısyzdar dep úmittenemin. Bolashaqta serikteske 1 jyl emes, 3-4 jyldyq merzim berý qajet dep sanaımyn. Kez kelgen bıznes uzaq merzimdi strategııa qurýǵa múmkindik alýy tıis. Qurmetti depýtattar, qoldaýlaryńyzdy suraımyn», dedi ol otyrys barysynda.
Nátıjesinde kelisimshartty uzartýǵa 29 depýtat daýys berip, bireýi qarsy boldy. Sheshim «Sergek» júıesiniń paıdasyna qabyldandy.