Almaty oblysyna qarasty Qarasaı aýdanynyń Irgelı aýylyndaǵy Lev Tolstoı atyndaǵy mektepte muǵalimderden jańa jyldyq bezendirý men balalarǵa arnalǵan kostıýmderge aqsha jınalǵan. Pedagogtardyń aıtýynsha, bul iske qatysýdan bas tartqandarǵa qysym kórsetilip, kemsitý bolǵany týraly vıdeo taraǵan, dep habarlaıdy Egemen.kz.
Áleýmettik jelilerde bir áıeldiń aýyl mektebine kelip, kamera aldynda aqsha jınaýdy bastaǵan qyzmetkerlermen daýlasyp jatqan vıdeosy taraǵan. Kadrlardan onyń muǵalimderden merekelik bezendirý men kostıýmderge árqaısysynan 2 myń teńgeden ne úshin jınalǵanyn anyqtaýǵa tyrysqany baıqalady.
«Bıýdjetten bólinetin aqsha qaıda? Bireý 2 myń teńge berýge kelispese, ol balalardyń ıgiligi úshin eshteńe jasaǵysy kelmeıtin adam sııaqty bolyp shyǵady. Maǵan tek osy aqshanyń qaıda ketkeni qyzyq», dep tańǵalady ol.
Almaty oblysy Qarasaı aýdandyq bilim basqarmasynyń baspasóz qyzmeti bul derek boıynsha tekserý júrgizilgenin, alaıda aqsha jınaý faktisi rastalmaǵanyn málimdedi.
«Tekserý nátıjesinde pedagogterden nemese ózge qyzmetkerlerden májbúrli túrde aqsha jınaý faktileri anyqtalǵan joq. Oqý kabınetterin bezendirý bastaýysh synyp muǵalimderiniń bastamasy bolǵan, aqsha jınaý júrgizilmegen. Atalǵan is-sharany mektep ákimshiligi uıymdastyrmaǵan. Qarasaı aýdandyq bilim bóliminiń 2025 jylǵy 8 jeltoqsandaǵy №807 buıryǵyna sáıkes, aldyn ala pedagogterden aqsha jınaýǵa tyıym salynatyny jóninde túsindirý jumystary júrgizilgen. Bul jaǵdaı mekteptiń Ádep keńesinde qaralyp, qoldanystaǵy zańnama men pedagogıkalyq ádep talaptaryna saı tıisti sheshimder qabyldandy. Qazirgi tańda jaǵdaı baqylaýda, túsindirý jumystary jalǵasyp jatyr. Ahýal turaqty», dep habarlady vedomstvo.
Eske salaıyq, buǵan deıin elordada ata-anasynyń qaıtys bolǵany jalǵan aqparat taratyp, aqsha jınaǵan er adam ustalǵan bolatyn.
Qostanaıda mektep muǵalimi áriptesteriniń atyna nesıe rásimdegen.