2 qańtar kúni tańǵy saǵat 08:00-degi málimet boıynsha, elimizdiń birqatar tasjolynda qozǵalys shekteldi, dep habarlaıdy Egemen.kz.
«QazAvtoJol» ulttyq kompanııasy habarlaǵandaı, qazirgi ýaqytta joldardaǵy jaǵdaı tómendegideı:
Aýa raıynyń buzylýyna baılanysty Qordaı asýynyń jańa aınalma joly (Kenen – Qaınar aýyldary aralyǵy) kóliktiń barlyq túri úshin jabyq. Júrgizýshiler eski Qordaı asýy arqyly qatynaı alady. Jol búgin saǵat 09:00 shamasynda ashylýy tıis.
Astana – Pavlodar baǵytyndaǵy «Qalqaman» kólik aıryǵynda qozǵalys shekteldi. Kópir qurylymynyń zaqymdanýyna baılanysty Qalqaman kentine kirý-shyǵý múmkin emes.
Osınov asýynda (О́skemen – Altaı baǵyty) tirkemesi bar aýyr júk kólikterine tyıym salyndy. Bul shekteý qys mezgili aıaqtalǵansha saqtalady.
Joldyń jaı-kúıi talapqa saı bolǵandyqtan, kelesi ýchaskelerde eń joǵary jyldamdyq 110 km/saǵ deıin kóterildi:
1. Astana – Kókshetaý – Petropavl (Aqmola oblysy aýmaǵynda).
2. Astana – Qaraǵandy (Jibek jolynan Temirtaýǵa deıingi aralyq).
Sınoptıkterdiń boljamynsha, respýblıkanyń basym bóliginde qar jaýyp, boran soǵady. Joldaǵy kóriný deńgeıi tómendeýi múmkin.