Venesýela bıligi el AQSh tarapynan áskerı agressııaǵa ushyrady dep málimdedi. Bul týraly úkimettiń resmı málimdemesinde aıtylǵan, dep habarlaıdy Egemen.kz.
Bılik dereginshe, soqqylar tek astanada ǵana emes, Mıranda, Aragýa jáne La-Gýaıra shtattarynda da tirkelgen. El prezıdenti Nıkolas Madýro tótenshe jaǵdaı rejımin jarııalap, qorǵanys kúshterin tolyq jaýyngerlik daıyndyqqa keltirýge buıryq berdi.
Sky News Arabia málimetinshe, Karakastaǵy jarylystar jergilikti ýaqytpen túngi saǵat 02:00 shamasynda bastalǵan. Áleýmettik jelilerde qala ústindegi jarqyldar, ushyp júrgen tikushaqtar, zymyran atqylaýlary men qoıý tútin beınelengen vıdeolar tarady. Astananyń ońtústiginde, iri áskerı baza mańynda elektr energııasy óshken. Venesýelalyq BAQ keminde alty-jeti jarylys bolǵanyn habarlady.
Sonymen qatar burynǵy prezıdent Ýgo Chavestiń mavzoleıi ornalasqan Kýartel-de-la-Montana 4F kazarmasy aýmaǵynda da jarylys bolǵany aıtyldy. Grınvıch ýaqytymen 06:15-ke deıin jarylystar jalǵasqany habarlanǵan.
Oqıǵaǵa baılanysty Kýba prezıdenti Mıgel Dıas-Kanel Gavana Venesýelaǵa jasalǵan soqqylardy aıyptaıtynyn málimdep, halyqaralyq qaýymdastyqty AQSh-tyń «qylmystyq shabýylyna» jaýap berýge shaqyrdy.
Buǵan deıin AQSh prezıdenti Donald Tramp Karakasqa qarsy kúsh qoldaný múmkindigin birneshe ret joqqa shyǵarmaǵan. Reuters dereginshe, ol jeke áńgimelerinde Madýrodan bılikten ketýdi talap etken. Al CBS News jýrnalısi Djennıfer Djeıkobstyń aıtýynsha, áskerı soqqylar jasaý týraly buıryqty Tramptyń ózi bergen.
Sondaı-aq The Wall Street Journal AQSh bıligindegi derekkózge silteme jasap, Venesýela aýmaǵynda amerıkalyq áskerı operasııa júrip jatqanyn habarlady.
Qazirgi ýaqytta Karakasta prezıdent rezıdensııasy mańyna bronetehnıka tartylyp, astanadan shyǵatyn joldarda keptelis paıda bolǵan. Qala turǵyndary jappaı ketip jatqany habarlanýda.