Salyq kodeksi: arnaıy rejımderge kóshý merzimi 28 aqpanda aıaqtalady

О́tpeli kezeń 2026 jylǵy 1 qańtardan 28 aqpanǵa deıin belgilengen.

Jańa Salyq kodeksine sáıkes arnaıy salyq rejımderiniń úsh túri qarastyrylǵan: ózin-ózi jumyspen qamtyǵandarǵa arnalǵan rejım, ońaılatylǵan deklarasııa negizindegi rejım jáne sharýa nemese fermer qojalyqtaryna arnalǵan rejım.

О́zin-ózi jumyspen qamtyǵandarǵa arnalǵan rejımdi jeke kásipker bolyp tirkelmegen, jaldamaly qyzmetker ustamaıtyn jáne Úkimet bekitken qyzmet túrlerin júzege asyratyn jeke tulǵalar qoldana alady. 2025 jyly patent nemese arnaıy mobıldi qosymsha arqyly jumys istegen jeke kásipkerler bul rejımge kóshý úshin 1 qańtar men 28 aqpan aralyǵynda jeke kásipker retinde tirkeýden shyǵýy qajet. Belgilengen merzimde tirkeýden shyqpaǵan nemese rejımdi ózgertý týraly habarlama tapsyrmaǵan tulǵalar 1 naýryzda salyq organdary tarapynan esepten shyǵarylady. Bul jaǵdaıda esepten shyǵarý kúni 2026 jylǵy 1 qańtar bolyp sanalady.

Ońaılatylǵan deklarasııa negizindegi arnaıy salyq rejımine 2025 jyly tirkelgen shegerimdi nemese bólshek salyqty qoldanǵandardy qosa alǵanda, talaptarǵa saı keletin barlyq salyq tóleýshiler óte alady. Ol úshin 1 qańtar men 28 aqpan aralyǵynda salyq salý rejımi týraly habarlama tapsyrý qajet.

Komıtettiń málimetinshe, 2025 jyly jalpyǵa birdeı belgilengen salyq salý tártibin qoldanǵan, sonyń ishinde arnaıy salyq rejımine sáıkessizdikke baılanysty osy tártipke aýysqan salyq tóleýshiler de atalǵan merzimde ońaılatylǵan deklarasııaǵa kóshýge quqyly.

Eger 2025 jyly ońaılatylǵan deklarasııany tirkelgen shegerim nemese bólshek salyqpen qoldanǵan salyq tóleýshiler habarlama tapsyrmasa, olar 2026 jylǵy 1 naýryzdan bastap jalpyǵa birdeı belgilengen salyq salý tártibine aýystyrylady. Bul tártipti qoldaný kúni 2026 jylǵy 1 qańtar bolyp esepteledi.

Memlekettik kirister komıteti kásipkerlerge óz qyzmetine sáıkes keletin salyq rejımin aldyn ala tańdaýǵa keńes berdi.