Prezıdent BUU-daǵy jumysyna qaıta oralýy týraly sybysqa qatysty jaýap berdi

Qysqa merzim ishinde Beıjińde, Vashıngtonda, Máskeýde, Ankarada, Abý-Dabıde, Tashkentte, Dýshanbede, Bishkekte, Ashhabadta jáne Tokıoda bolǵan Memleket basshysy bul saparlardyń mańyzyn Qazaqstannyń halyqaralyq quqyq sýbektisi retindegi róliniń artýymen baılanystyrdy.

Prezıdenttiń aıtýynsha, elimiz Eýrazııa kindiginde ornalasqandyqtan, álemdik almaǵaıyp zamanda beıtarap qala almaıdy. 

«Qazaqstan Eýrazııa kindiginde ornalasqan el retinde, ásirese, qazirgi almaǵaıyp zamanda túrli úderisten syrt qalmaýy kerek. Bizdiń halyqaralyq qatynastaǵy negizgi máseleler týraly óz kózqarasymyz, naqty ustanymymyz bolýǵa tıis. Sondyqtan, men BUU Bas Assambleıasynyń mereıtoılyq sessııasynda osy ámbebap jahandyq uıymdy reformalaýǵa qatysty Qazaqstannyń ustanymyn egjeı-tegjeıli aıtyp óttim», dedi Qasym-Jomart Toqaev.

Sonymen qatar Memleket basshysy qoǵamda talqylanyp júrgen «araaǵaıyndyq» pen BUU-ǵa oralý múmkindigi týraly boljamdarǵa qatysty pikir bildirdi.

«Halyqaralyq daý-damaılarda araaǵaıyn bolatyn eshqandaı oıym joq, sondaı-aq, birqatar eldiń usynys-pikirine qaramastan, BUU-daǵy jumysqa qaıta oralatyn nıetim de joq. Biraq, jabyq keńester men pikirtalastarǵa qatysamyn, onyń ústine birqatar memleket basshylary meniń pikirimdi bilgisi keledi. Men úshin osy mańyzdy jumysty buqaralyq aqparat quraldarynda jarııalaýdyń esh qajeti joq, sebebi popýlızmnen aýlaqpyn. Bul ustanymym jabyq keńesterge qatysýshylar úshin de mańyzdy bolsa kerek», dedi Prezıdent.

Suhbatta syrtqy saıasattyń ekonomıkalyq tıimdiligi de sóz boldy. О́tken jyly elimizdiń basym baǵyttaryn damytý úshin 70 mlrd dollardan asatyn ınvestısııalyq qujattarǵa qol qoıylǵan. 

Eske salaıyq, búgin Qazaqstan Prezıdenti Qasym-Jomart Toqaev «Turkistan» gazetine keń kólemdi suhbat berdi. Onda ol kólik jáne logıstıka salasyn damytý Qazaqstan úshin strategııalyq mańyzy bar basymdyq ekenin atap ótti. Qasym-Jomart Toqaev Nursultan Nazarbaevtyń Vladımır Pýtınmen kezdesýleri beıresmı sıpatqa ıe ekenin aıtty. Sondaı-aq Prezıdent sońǵy jyldary tarıh­ty talqylaý sánge aınalǵanyn sóz etti. Túrli pod­kast­tar, fılmder, maqalalar men kitap­tar shyǵyp jatqanynan habardar ekenin jetkizdi. Qasym-Jomart Toqaev Qańtar oqıǵasyna qatysqan azamattarǵa baılanysty sot prosesteri men tergeý jumystary jóninde pikir bildirdi. Memleket basshysy bul taqyrypqa qatysty negizgi derekter áldeqashan belgili bolǵanyn aıtyp, keıbir sot isteri men urlanǵan qarýdy izdestirý jumystary áli de jalǵasyp jatqanyn málimdedi.