Álemdik naryqta munaı baǵasy qymbattady. Buǵan Irandaǵy saıası ahýal jáne oǵan qarsy sanksııalardyń kúsheıýi sebep boldy. 12 qańtarda munaı jeti aptadaǵy eń joǵary deńgeıge kóterildi, dep jazady Egemen.kz.
Reuters málimetinshe, Brent markaly munaı bir barrel úshin 63,87 dollar boldy. Baǵa bir kúnde 0,8 paıyzǵa ósti. AQSh-ta óndiriletin WTI markaly munaı 59,5 dollar deńgeıine jetti. Bul sońǵy bir aıdan bergi eń joǵary kórsetkish.
Naryqtaǵy basty alańdaýshylyq Iranmen baılanysty. Elde úkimetke qarsy narazylyq kúsheıip tur. Batys elderi sanksııany qataıtýy múmkin. Eger Iran munaıdy az satsa, álemdik naryqta tapshylyq paıda bolýy yqtımal. Osy qaýip baǵany kóterdi.
AQSh prezıdenti Donald Tramp Iranmen baılanys bar ekenin aıtty. Ol ırandyq oppozısııamen de sóılesip otyrǵanyn jetkizdi. Sondaı-aq sherýshilerge kúsh qoldaný jalǵasa berse, áskerı shara qoldanylýy múmkin ekenin eskertti.
Baǵanyń odan ári ósýine Venesýela cebep bolyp otyr. Bul el munaıdy qaıta kóptep shyǵara bastaıdy degen úmit bar. Tramptyń aıtýynsha, Karakas bıligi AQSh-qa sanksııada turǵan 50 mıllıon barrel munaı berýge daıyn. Qazir kompanııalar tasymaldaýǵa keme izdep jatyr.
Trafigura kompanııasy alǵashqy kemesiniń osy aptada júkteletinin habarlady. Al Qytaıǵa baǵyt alǵan eki iri tanker baǵytyn ózgertip, keri qaıtty. Buǵan AQSh qysymynyń kúsheıýi sebep. Qytaı Venesýela munaıyn kóp satyp alady. Biraq «munaıǵa aıyrbas qaryz» júıesiniń bolashaǵy endi bulyńǵyr.
Reseıge qatysty qaýip te naryqqa áser etti. Ýkraına Reseıdiń energetıka nysandaryna soqqy berip júr. AQSh jańa sanksııalar engizýi múmkin. Bul munaı jetkizilimine qaýip tóndiredi.
Ázerbaıjan da munaı eksportyn azaıtty. 2025 jyly bul el 23,1 mıllıon tonna munaı shyǵardy. Bir jyl buryn bul kórsetkish 24,4 mıllıon tonna bolǵan.
Soǵan qaramastan, baǵa uzaq ýaqyt joǵary deńgeıde turmaýy múmkin. Goldman Sachs sarapshylary munaı, kerisinshe, kóp óndirile bastaıdy dep otyr. Sol sebepti naryqta artyq kólem paıda bolýy yqtımal. Biraq Iran, Reseı jáne Venesýeladaǵy jaǵdaı baǵany qubyltyp turady.