Áıel úshin eń jamany – jalǵyzdyq

Jaqynda áleýmettik je­li­lerde Qytaı elinde bilim alyp júrgen qazaq qyzdarynyń kó­bisiniń ishimdikke qumar ekeni, araqqa sylqııa toıyp alyp, ja­taqhanalarda jyn-oınaq jasaıtyny týraly aqparattar eldi dúr silkindirgen-di. Abyroı bolǵanda artynsha olardyń jalǵan ekeni, áldekimderdiń qy­sastyqpen jarııa etip jibergeni málim boldy. Áıtse de, sońǵy jyldary áıelderdiń alkogoldi ishimdikke qumartyp bara jatqany tosyn jańalyq bolmaı qaldy. «Aýrýyn jasyrǵan óledi» degen. Otbasynyń berekesi bolýy tıis analardyń araqqa salynyp ke­týiniń sebebi nede? – Búgingi tańda dıspanserlik esepte 8620 adam tirkelgen bolsa, onyń 1011-i áıelder, – deıdi bul jóninde Jambyl oblystyq narkologııalyq dıspanseriniń bas dárigeri Jaqyp Jeksembıev. – Shynyn aıtý kerek, kúndelikti ómirde áıelderdiń maskúnemdigi jaıynda kópshilik jaqsy bile bermeıdi. Máselen, ashy sýmen dos bolǵan áıelderdiń sany erlerge qaraǵanda, álde­qaıda az deıdi. Biraq bul – qate. Shyndyǵynda, erlerdiń ishimdikke salynýy birden kózge túsip qalady. Al áıelder bolsa mundaı jaman ádetten uıalady, kóp rette ondaı qylyqtaryn ja­syryp júredi. Ásirese, et ja­qyn­daryna bildirmeýge tyrysady. Bizdiń dıspanserde emdelip júrgen áıelderdiń biri jumys satysy boıynsha alǵa basýdyń ornyna bos ýaqytyn bala tár­bıeleýge arnaıdy. Bylaısha qarasańyz, eshqandaı sókettik joq. Áıtse de, qyryq jasqa aıaq basqan kezde erli-zaıyptylar arasyndaǵy araqatynas óz­gergen. Jubaılardyń ortaq áńgi­mesi azaıyp, bir-birine degen qyzy­ǵýshylyqtary joǵalady. Mun­daı kórinisterdiń sońy kóbine shańy­raqtyń shaıqalýyna ákelip soǵady. – Bizdiń túsinigimizde áıeldiń araqqa salynýyna negizinen tur­mystyń tómendigi, kúnkóristiń qıyndyǵy sebep bolatyn sııaqty edi... – Árıne, áıel kúızeliske ushyraǵan kezde iship ke­týi múmkin. Biraq, qazir mun­daı­lardyń qatarynda dáýletti ot­basylardyń áıelderi de bar. Olarda bári bar. Kúıeý, bala, úı, baılyq. Biraq kúıeýi tek óz jumysymen ǵana aınalysady, balalary mektepte nemese balabaqshada. Kórdińiz be, áıel taǵy da jalǵyz qaldy. Otbasy, jumysy bar, biraq, ómirden lázzat almaıdy. Osydan keıin aldymen qymbat ishimdik iship, keıinnen esirtki paıdalanýǵa beıimdelip ketken áıelder de jeterlik. Tipti, uıyqtaý úshin nemese ashýyn basyp, ózin tynyshtandyrý úshin jıi-jıi ashy sýdan urttap, alty aı nemese bir jyldaı ýaqyt ótkende sol «dárisinen» bas tarta almaıtyn jaǵdaıǵa jetkender de bar. О́kinishke qaraı, bizdiń qoǵamda áli de salamatty ómir saltyn ustanyp, basseınge, fıtnes-ortalyqqa barý degen júzege aspaı otyr. Oralhan DÁÝIT, «Egemen Qazaqstan». Jambyl oblysy.