Konstıtýsııalyq reforma aıasynda usynylyp otyrǵan ózgerister bolashaq Parlamenttiń, ıaǵnı Quryltaıdyń saıası salmaǵyn edáýir arttyrýǵa baǵyttalǵan. Bul týraly Májilis depýtaty Aıdos Sarym Astanada ótip jatqan Konstıtýsııalyq reforma jónindegi komıssııanyń úshinshi otyrysynda málimdedi, dep habarlaıdy Egemen.kz.
Komıssııa múshesi óz sózinde jańa Parlamenttiń qyzmetine tikeleı qatysty 50, 51 jáne 53-baptarda kózdelgen túzetýlerge erekshe toqtaldy. Onyń aıtýynsha, barlyq usynys Memleket basshysynyń Qyzylorda qalasynda ótken Ulttyq Quryltaıdyń V otyrysynda bergen tapsyrmalaryn negizge ala otyryp ázirlengen.
«Usynylyp otyrǵandaı, bolashaq Quryltaı proporsıonaldy ókildik júıesi boıynsha saılanatyn 145 depýtattan turady. Quryltaı depýtattarynyń ókilettik merzimin qazirgi Májilispen birdeı – 5 jyl deńgeıinde saqtaý usynylyp otyr. Bul ózgeris tolyq qoldaý tabady. Sonymen qatar, Quryltaı depýtattyǵyna kandıdattarǵa qoıylatyn qosymsha talaptar arnaıy Konstıtýsııalyq zańdarda kózdelýi múmkin», dedi depýtat.
Onyń pikirinshe, bolashaq Quryltaıdyń mazmundyq jáne tujyrymdamalyq turǵydan eń mańyzdy ózgeristeri 53-bapta kórinis tapqan. Atalǵan túzetýler memlekettik basqarý júıesin qaıta teńgerýge, bılik tarmaqtary arasyndaǵy ózara tejemelik pen tepe-teńdik qaǵıdattaryn nyǵaıtýǵa baǵyttalǵan.
Aıdos Sarym qazirgi qoldanystaǵy Konstıtýsııada Parlament palatalarynyń ókilettikteri 53-baptyń 13 tarmaǵynda belgilengenin eske saldy. Al jańa redaksııada bul tarmaqtar sany 23-ke deıin ulǵaıady.
«Iаǵnı, ókilettikter kólemi bir jarym eseden astam artady. Bul jańa ókilettikterdiń barlyǵy jalpyulttyq referendýmda maquldanǵan jaǵdaıda tıisti Konstıtýsııalyq zańdar aıasynda naqtylanyp, júzege asyrylady. Atalǵan ózgerister túrli qoǵamdyq alańdarda birneshe ret aıtylyp, jumys tobynyń otyrystarynda jan-jaqty talqylandy jáne Qyzylorda qalasynda ótken Ulttyq Quryltaıda Memleket basshysynyń tarapynan tujyrymdamalyq turǵyda qoldaý tapty. Sondyqtan bul tujyrymdamalyq ózgeristerdi biz qoldaımyz», dep málimdedi ol.
Depýtattyń paıymdaýynsha, usynylyp otyrǵan túzetýler Parlamenttiń ınstıtýsıonaldyq rólin kúsheıtip, eldegi saıası júıeniń turaqtylyǵy men tıimdiligin arttyrýǵa qyzmet etedi.