Konstıtýsııalyq reforma jónindegi komıssııanyń toǵyzynshy otyrysynda Májilis depýtaty, «Ulttyq volonterlik jeli» ZTB jetekshisi Vera Kım Qazaqstanda Konstıtýsııalyq deńgeıde volonterlikti yntalandyrýdy bekitý qajet degen bastama kóterdi, dep jazady Egemen.kz.
Vera Kım Memleket basshysynyń eriktiler qozǵalysyna turaqty túrde qoldaý kórsetetinin eske saldy. Bıylǵy jyldyń 30 qańtarynda aýqymdy kólemde ótken Eriktiler forýmy osynyń jarqyn dáleli boldy.
«Jańa Konstıtýsııa jobasyna usynystar jınaý jarııalanǵan sátten bastap maǵan volonterlik uıymdar men eriktilerdiń ózderinen 31-baptyń 2-tarmaǵyn «volonterlik» degen sózben tolyqtyrý týraly ótinishter birneshe ret kelip tústi. Osyǵan baılanysty Qazaqstanda áleýmettik qamsyzdandyrý men qaıyrymdylyqty qurýdy kótermeleýmen qatar volonterlikti yntalandyrýdy bekitýdi usynamyn», dedi ol.
Onyń aıtýynsha, bul bapta áleýmettik qoldaýdy qamtamasyz etýdegi memleket yntalandyratyn qoǵamnyń qatysý nysandary keltirilgen. Atap aıtqanda, onda saqtandyrý men qaıyrymdylyq kórsetilgen, biraq basqa mańyzdy nysan – azamattardyń jeke óteýsiz eńbegi kórsetilmegen.
«Eriktiler tótenshe jaǵdaılar kezinde, aýrýhanalarda kómektesedi, áleýmettik salada qarttardy, balalardy, múgedek adamdardy, qıyn jaǵdaıda otbasylardy qoldaıdy. Bul búkil el boıynsha jumys istep jatqan áleýmettik qoldaý júıesiniń mańyzdy bóligi», dedi Vera Kım.
Depýtat «volonterlik» sózi normany logıkalyq túrde tolyqtyratynyn, óıtkeni bul jaǵdaıda memleket tek resýrstar men tetikterdi ǵana emes, azamattardyń da qatysýyn yntalandyratynyn atap kórsetti.
QazMed Digital: Medısınalyq volonterlik jańa deńgeıge shyqty
«Men bul bastamany búkil eriktiler qozǵalysynyń atynan kóteremin», dedi ol.
Sondaı-aq Vera Kım saýalnamalarǵa sáıkes árbir segizinshi azamattyń volonterlik tájirıbesi bar ekendigin kórsetetin derekterge toqtaldy. Resmı málimetter boıynsha, eriktilikke 300 myńǵa jýyq adam tartylǵan, 800-den astam uıym men 3,5 myń bastamashyl top jumys isteıdi.
«Biz úshin bul jaı ǵana qyzmet emes – bul bizdiń qoǵamnyń turaqtylyǵy men ál-aýqatyna qosqan úlesimiz», dedi depýtat.
Sonymen qatar ol qoǵamda ekologııalyq mádenıetti qalyptastyrýdaǵy eriktilerdiń erekshe rólin atap ótti.
«Igi ister marafony»: 2025 jyly volonterler 9 myńnan astam ıgi is jasady
Vera Kımniń aıtýynsha, olar ózderiniń naqty áreketterimen tabıǵatqa jáne qorshaǵan ortaǵa degen jaýapkershilikke uqypty qaraýdyń úlgisin kórsetedi. Aýmaqtardy tazartý, aǵash otyrǵyzý, tabıǵı nysandardy saqtaý jáne ekologııalyq bilim berý boıynsha eriktiler bastamalary arqyly tabıǵat qundylyǵy týraly praktıkalyq túsinik qalyptasady.
«Kóptegen adamdar úshin mundaı jobalarǵa qatysý sanaly ekologııalyq tártipke degen alǵashqy qadam, al jastar úshin azamattyq jaýapkershilik pen qoǵamdyq ıgilikke qurmetpen qaraýdyń mańyzdy mektebi bolyp tabylady», dep atap ótti ol.
Vera Kım jańa Konstıtýsııa jobasynda joǵary ekologııalyq mádenıettiń memlekettiń irgeli qaǵıdaty retinde ornyǵýy qoǵamdyq qozǵalysqa júıeli jáne uzaq merzimdi sıpat beretinin atap ótti.
Nátıjesinde qorshaǵan ortaǵa qamqorlyq bir rettik aksııaǵa emes, bilim berý, quqyqtyq retteý jáne qoǵamdyq bastamalar arqyly qoldaý kórsetiletin memlekettik saıasattyń strategııalyq baǵytyna aınalady.
«Azamattar úshin bul taza jáne qaýipsiz ómir súrý ortasy, densaýlyqty qorǵaý jáne tabıǵı resýrstardy saqtaýdan kórinedi. Volonterlerdiń belsendiligi men ekologııalyq mádenıetti konstıtýsııalyq turǵyda taný tutastaı alǵanda ár adam eldiń tabıǵaty men bolashaǵyn saqtaýdyń qatysýshysy bolatyn damýdyń turaqty modelin qalyptastyrady», dep túıindedi ol.
Aıta keteıik, jańa Konstıtýsııalyq komıssııanyń toǵyzynshy otyrysynda Konstıtýsııalyq Sot tóraǵasynyń orynbasary Baqyt Nurmuhanov teńgeni ulttyq valıýta retinde bekitetin norma engizilgenin aıtty.