Erke Ertisti jaǵalaı jaılaǵan Kúrshim aýdanynda qusbegiliktiń II oblystyq chempıonaty ótti. Eki kún qatarynan Topterek aýylynyń aspanynda qyran qalyqtap, qus kótergender máre-sáre bolysty.
Aıta keteıik, aýqymdy jarysty oblystyq dene shynyqtyrý jáne sport basqarmasy men Kúrshim aýdanynyń ákimdigi uıymdastyrdy. Dúbirli dodaǵa О́skemennen, Zaısan, Ulan jáne Úlken Naryn aýdandarynan eń úzdik degen qusbegiler jınaldy. Saıysqa uzyn sany 25 búrkit pen 6 ıtelgi qatysty.
Qyran qus kókke samǵap baryp, tómen shúıilgende jınalǵan jurttyń qıqýy kúsheıedi. Tómende jortqan qoıanǵa da jan kerek, jaltaqtaı qashady. Tegeýrini kúnge shaǵylysyp, ótkir janary jylt etken tyshqandy baıqaıtyn búrkit orǵı qashqan qoıandy qoısyn ba? Keshe jaýǵan ulpa qardyń betinen ile jóneledi.
Nátıjesinde, Ulan aýdanynyń namysyn qorǵaǵan Gorkıı Najıtban jeńimpaz atanyp, 1-oryndy ıelendi. 2-oryn Zaısan qalasynan kelgen Aqynbek Tólepbergenge buıyrdy. Al 3-oryndy kishkentaı búrkitshi qyz Aızere Najıtban qanjyǵasyna baılady. Qusbegiler búrkit salý ǵana emes, qolǵa shaqyrý jáne shyǵarǵa salýdan da joǵary sheberlik kórsetti.
Al ıtelgi ushyrýdan О́skemennen kelgen Samǵat Erdana altyn júlde ıelendi. 2-oryn Kúrshim aýdanynyń búrkitshisi Aıdos Jandykeevke berildi. 3-oryndy Zaısan qalasynan kelgen Tólepbergen Boranbaı enshiledi. Barlyq jeńimpazdar men júldegerler tıisti dárejedegi medaldarmen jáne gramotalarmen marapattaldy.
Respýblıkalyq «Qusbegilik» federasııasynyń reglamentine saı ótken bul týrnır óńirdegi saıatshylyq ónerin jańǵyrtýdyń jarqyn úlgisi boldy. Sharada qatysýshylardyń qaýipsizdigine basa nazar aýdarylyp, medısınalyq qyzmet pen jol polısııasynyń súıemeldeýi tolyq qamtamasyz etildi. Topterek aýylyndaǵy bul doda ulttyq rýhty asqaqtatyp, óskeleń urpaqty ata kásipke baýlýda mańyzdy ról atqardy.
Shyǵys Qazaqstan oblysy,
Kúrshim aýdany