Keńeıtilgen úkimet otyrysynda el Prezıdenti Qasym-Jomart Toqaev sıfrlyq memleket qurý máselesine aıryqsha nazar aýdarý qajettigin málimdep, bul baǵyt eldiń bolashaǵyna tikeleı áser etetin strategııalyq basymdyq ekenin atap ótti. Memleket basshysy salǵyrttyqqa jol berilse, qolda bar múmkindikten aıyrylyp qalý qaýpi bar ekenin eskertti, dep jazady Egemen.kz.
«Sıfrlyq memleket qurý máselesine aıryqsha kóńil bólý kerek. Bul Qazaqstannyń bolashaǵyna tikeleı áser etedi. Sondyqtan jumysqa selqos qarap, jaıbaraqat júrýge bolmaıdy. Áıtpese, qoldaǵy múmkindikten aıyrylyp qalamyz», dedi Prezıdent.
Memleket basshysynyń aıtýynsha, sıfrlyq tásilder artyq shyǵyndy qysqartyp, ákimshilik kedergilerdi azaıtýǵa múmkindik beredi. Sonymen qatar basqarýdaǵy tıimsiz sheshimderdi barynsha azaıtýǵa jol ashady. Bul úderistiń ózeginde jasandy ıntellekt turýy tıis.
«Jasandy ıntellektini tolyqqandy engizý búkil sıfrlandyrý saıasatynyń ózegi bolýǵa tıis. Jasandy ıntellektige negizdelgen asa mańyzdy sıfrlyq jobalardy júzege asyrý máselesin aıryqsha nazarda ustaý kerek», dedi Qasym-Jomart Toqaev.
Toqaev: Jasandy ıntellektini paıdalaný úshin tıisti zańnamalyq negiz qalyptastyrý mindet
Prezıdent Úkimetke mundaı jobalardy tolyq ári ýaqtyly qarjylandyrý úshin negizgi basymdyqtardy naqty aıqyndaýdy tapsyrdy. Áıtpese, aýqymdy josparlardyń qaǵaz júzinde qalyp qoıý qaýpi bar ekenin qadap aıtty.
Sonymen qatar Memleket basshysy sıfrlandyrýǵa qatysty formalızmdi synǵa aldy. Onyń aıtýynsha, keı jaǵdaıda Úkimet músheleri men ákimder salalardaǵy kemshilikterdiń bárin jappaı sıfrlandyrýmen «jabýǵa» tyrysady.
«Jappaı sıfrlandyrý engizilse, barlyq olqylyq ózdiginen joıylady deıdi. Bul arada ne aıtýǵa bolady? Adamdar ózin qorǵaýdyń, basyn arashalap alýdyń nebir quıtyrqy ádisin tabady», dedi Prezıdent.
Jaslan Mádıev: Sıfrlandyrý – ekonomıkanyń qozǵaýshy kúsh
Qasym-Jomart Toqaev sapaly sıfrlyq damý úderisin jeke sektormen tyǵyz baılanysta qarastyrý qajet ekenin atap ótti. Úkimet bızneske sıfrlyq tásilderdi engizýge múmkindik beretin naqty qoldaý sharalaryn ázirleýi tıis.
Memleket kórsetetin qyzmetterdi sıfrlandyrý jáne memlekettik derekqorlardy ózara kiriktirý jumystary júrip jatqanymen, málimetterdi basqarý isiniń sapasy áli de kóńil kónshitpeıdi. Osyǵan baılanysty Prezıdent derekterdi memlekettiń strategııalyq resýrsy retinde basqarýǵa kóshýdiń mańyzyn atap ótti.
«Biryńǵaı standart engizip, málimetterdi memlekettiń strategııalyq resýrsy retinde basqarýǵa kóshý óte mańyzdy. Úkimetke Strategııalyq josparlaý jáne reformalar agenttigimen, sondaı-aq Ulttyq bankpen birlesip jyl sońyna deıin memlekettik málimetterdi basqarýdyń birtutas júıesin qurýdy tapsyramyn», dedi Memleket basshysy.
Prezıdent sońǵy ýaqytta memlekettik sıfrlyq júıelerdiń jıi isten shyǵýyn IT-sheshimderdiń eskirýimen jáne basqarý sapasynyń tómendigimen baılanystyrdy. Mundaı olqylyqtar memlekettiń bıznes pen azamattarmen qarym-qatynasyna keri áser etetinin aıtty.
Sıfrlyq transformasııanyń barlyǵy QazTech platformasynyń negizinde júrgizilýi tıis. Osyǵan baılanysty Úkimet biryńǵaı sıfrlyq platformaǵa kóshýdi qamtamasyz etýi qajet.
Elimizde barlyq memlekettik qyzmet bir platformaǵa kóshiriledi
Prezıdent vedomstvolardyń sıfrlandyrýmen uzaq ýaqyt boıy baqylaýsyz, árqaısysy óz betinshe aınalysqanyn synǵa alyp, bul qazyna qarjysynyń tıimsiz jumsalýyna ákelgenin atap ótti. Bas prokýratýrada ótken jıynda shashyrańqy júıelerdi biriktirýge qajet qarjy kólemi jarııalanǵanyn da eske saldy.
«Basyn ashyp aıtaıyn, mundaı aqsha jumsalýy múmkin emes. Aqshasy bolsa, ǵımaratty aqymaq ta salady, al osy mindetti qarjysyz sheshýge sheberlik qajet. Al sheberlikterińizdi kórsetińizder. Úkimet bıýdjetten qyrýar qarajat shyǵyndamaı, tapsyrmany oryndaýdyń josparyn usynýǵa tıis», dedi Qasym-Jomart Toqaev.
Memleket basshysy sıfrlyq jańǵyrý tek tehnologııalyq emes, basqarýshylyq jaýapkershilik pen naqty nátıjege negizdelýi tıis ekenin taǵy bir márte qadap aıtty.