Prezıdent Úkimettiń keńeıtilgen otyrysynda sońǵy jyldary aımaqtardyń kiris qory aıtarlyqtaı artyp, birqatar salyq pen tólem túrleri respýblıkalyq deńgeıden aımaqqa berilgenin, sonyń saldarynan jergilikti bıýdjetke qosymsha shyǵyndardy artyp qoıý jaǵdaılary jıilep ketkenin aıtty, dep habarlaıdy Egemen.kz.
Memleket basshysynyń aıtýynsha mundaı tájirıbe bıýdjetaralyq qatynastardyń qısynyna qaıshy ári qabyldanyp jatqan sheshimderge senimdi joǵaltady. Sondyqtan jergilikti atqarýshy organdarǵa beriletin qarjy resýrstary men olardyń mindettemeleri bir-birimen mólsherles bolýyn eskerý óte mańyzdy.
Prezıdent Úkimetke bıýdjet baǵdarlamalaryna revızııa júrgizýdi tapsyrdy
«Qazaqstan – bir ortalyqtan basqarylatyn ýnıtarly, birtutas el. Sol sebepti elimizdiń áleýetin nyǵaıtýdy, halqymyzdyń ál-aýqatyn arttyrýdy basty maqsat etip, aqyl-parasatpen, bir qoldyń salasyndaı jumylyp jumys isteý qajet. Jańa Bıýdjet kodeksinde bıýdjetaralyq qatynastar naqtylyq jáne barlyq bıýdjet deńgeıindegi jaýapkershilik turǵysynan qaıta qaraldy. Endi osy normalar óńirlerde is júzinde qalaı jumys isteıtinin baıqap kórý kerek. Eger qoldanystaǵy quraldar tıimsiz ekenin kórsetse, ony túzetý qajet. Bul jerde eshqandaı kúmán joq. Sheshimdi tez ári batyl qabyldaý qajet.
Jańa erejeler óńirlerdiń qarjylyq derbestigine tusaý bolmaýǵa tıis. Eń bastysy, olardyń kiris kózderin ulǵaıtýǵa degen ynta-jigerine keri áser etpeýi kerek. Úkimet aımaqtardyń qarjylyq ornyqtylyǵyn nyǵaıtý sharalaryn qabyldaýǵa mindetti. Bul – strategııalyq sıpaty bar maqsat. Basqarýdyń túrli deńgeıi arasyndaǵy jaýapkershilikke salǵyrt qaraýǵa bolmaıdy», dedi Prezıdent.
Memleket basshysy: Salyq júıesin jappaı sıfrlandyrýǵa shuǵyl kirisken jón
Memleket basshysynyń tapsyrmasymen byltyr 2030 jylǵa deıin aımaqtardy damytýǵa arnalǵan tujyrymdama bekitildi. Basty maqsat – óńirler arasyndaǵy áleýmettik-ekonomıkalyq teńsizdikti azaıtyp, halyqtyń ál-aýqatyn arttyrý. Osy tujyrymdama aıasynda aımaqtardyń ekonomıkasy turaqty ósip-órkendep keledi. Biraq sheshimin tappaǵan máseleler áli de bar.
«Aımaqtardyń ınfraqurylymmen qamtylý deńgeıi ortasha eseppen alǵanda – 64,1 paıyz. Bul kórsetkish ár óńirde ártúrli, aıtarlyqtaı alshaqtyq bar. Qajetti ınfraqurylymnyń bolmaýy oblystardyń damýyna jáne halyqtyń turmys sapasyna keri áserin tıgizip otyr. Ásirese, jańadan qurylǵan Abaı jáne Ulytaý oblystarynda ınfraqurylym jetkiliksiz. Almaty oblysynda da ahýal máz emes. Bul aımaqtardyń damýyna aıryqsha nazar aýdarý qajet.
Aımaq basshylary ekonomıkany ártaraptandyrýǵa jáne azamattardyń tabysyn arttyrýǵa basa mán berýge tıis. Inflıasııany tómendetý úshin tıimdi sharalar qabyldap, sapaly ınvestısııa tartýy kerek, shaǵyn jáne orta bıznesti damytý arqyly jańa jumys oryndaryn ashýy qajet», dedi Memleket basshysy.
Prezıdent: Ata zańymyzǵa qatysty túpkilikti sheshim jalpyulttyq referendýmda qabyldanady