Jańa Konstıtýsııanyń kúshine ený tártibi men ótpeli kezeńniń barlyq rásimderi naqty ári birjaqty jazylýy kerek. Konstıtýsııalyq reforma jónindegi komıssııanyń kezekti otyrysynda osy másele jan-jaqty talqylandy. Depýtattar saıası úderistiń úzdiksizdigin saqtaý úshin quqyqtyq aıqyndyqtyń sheshýshi máni bar ekenin atap ótti, dep jazady Egemen.kz.
Komıssııa otyrysynda sóz alǵan Májilis depýtaty Snejanna Imasheva jańa Konstıtýsııa jobasynda ótpeli erejelerdiń barlyǵy egjeı-tegjeıli kórsetilýi qajet degen pikir aıtty. Onyń aıtýynsha, eń aldymen Konstıtýsııanyń naqty qaı sátten bastap kúshine enetini aıqyndalýy tıis.
«Jobada onyń erejeleri naqty qaı sátten bastap kúshine enetinin bekitý kerek. Respýblıkalyq referendýmnyń nátıjeleri resmı jarııalanǵan kúnnen bastap pa álde naqty belgilengen ózge kúnnen bastap pa?» dedi depýtat.
Depýtat Konstıtýsııanyń «Jalpy erejeler» bólimin jańasha ataýdy usyndy
Snejanna Imasheva ótpeli kezeńde qazirgi memlekettik bılik organdarynyń mártebesin de naqtylap alý qajet ekenin jetkizdi. Ásirese qoldanystaǵy Parlamenttiń ókilettigi qaı ýaqytqa deıin jalǵasatyny, Quryltaı saılaýy qandaı merzimde jáne qandaı tártippen ótetini ashyq jazylýǵa tıis.
«Meniń oıymsha, bul máselelerdi zańnamalyq fýnksııanyń úzdiksizdigin qamtamasyz etip, sonymen qatar Konstıtýsııadaǵy ınstıtýsıonaldyq jańashyldyqtardy iske asyrý qajettigin eskere otyryp qarastyrý kerek», dedi ol.
Depýtat Imasheva Qazaqstannyń jańa Konstıtýsııasyn qabyldaý ıdeıasyn qoldady
Depýtat sondaı-aq ótpeli erejelerde Konstıtýsııalyq sottyń, Ortalyq saılaý komıssııasynyń jáne Joǵary aýdıtorlyq palatanyń jańa quramyn qalyptastyrý tetikteri qamtylýy mańyzdy ekenin atap ótti. Buǵan qosa, negizgi memlekettik organdardyń laýazymdy tulǵalaryn taǵaıyndaý tártibi de naqty reglamenttelýi qajet.
«Osy rásimderdi naqty bekitý quqyqtyq aıqyndyqty qamtamasyz etedi jáne ınstıtýsıonaldyq aýysý kezeńinde konstıtýsııalyq organdardyń joqtyǵy jaǵdaıyn boldyrmaýǵa múmkindik beredi», dedi Snejanna Imasheva.
Toqaev: Advokattardyń usynysymen Ata zań jobasyna advokatýra týraly jeke bap qosyldy
Onyń aıtýynsha, jańa Konstıtýsııa kúshine engen sátten bastap qoldanystaǵy zańdar men ózge de normatıvtik quqyqtyq aktilerdiń taǵdyry da aıqyn kórsetilýi kerek. Qaı qujattar óz kúshin saqtaıtyny jáne olar qandaı merzimde jańa Konstıtýsııaǵa sáıkestendiriletini naqty belgilenýi tıis.
«Atalǵan erejelerdi bekitý quqyqtyq aıqyndyqty, memlekettik ınstıtýttardyń jumysyn boljaýdy jáne ótpeli kezeńde árbir organnyń ókilettik shegin naqtylaýdy qamtamasyz etedi», dep túıindedi depýtat.