Májilis depýtaty, Qazaqstan Halyq partııasy (QHP) fraksııasynyń jetekshisi Magerram Magerramov Konstıtýsııalyq reforma jónindegi komıssııanyń 12-shi otyrysynda jańa Konstıtýsııa jobasynyń el damýy úshin mańyzyn atap ótti. Onyń aıtýynsha, qujat óńirlerde keńinen talqylanyp, qoǵam tarapynan qoldaý tapqan, dep habarlaıdy Egemen.kz.
Depýtat jańa joba «Ádiletti Qazaqstan» qaǵıdatyn memlekettik damýdyń irgeli baǵdary retinde aıqyndaǵanyna nazar aýdardy.
«Qazaqstan Respýblıkasynyń jańa Konstıtýsııasynyń jobasy alǵash ret Preambýla men jalpy erejeler deńgeıinde memlekettik damýdyń irgeli baǵdary retinde «Ádiletti Qazaqstan» qundylyǵyn belgiledi. Ádiletti Qazaqstan qaǵıdaty Qazaqstan Halyq partııasy tolyq qoldaıtyn áleýmettik ádilettilikti bildiredi. Ádiletti Qazaqstan – «Zań men Tártip» qaǵıdatyn sózsiz ustanatyn, teń múmkindikter usynatyn el», dedi Magerram Magerramov.
«BAITAQ» partııasy «Ekologııa jáne adam densaýlyǵy» uǵymyn memlekettiń bazalyq qundylyǵy retinde bekitýdi usyndy
Onyń sózinshe, qujatta tarıhı sabaqtastyq pen ulttyq qundylyqtarǵa aıryqsha mán berilgen. Preambýlada etnosaralyq jáne konfessııaaralyq kelisim qoǵamdyq turaqtylyq pen ornyqty damýdyń basty negizi retinde kórsetilgen. Sondaı-aq eńbek etý quqyǵyna qatysty norma erekshe qoldaýǵa ıe bolǵan.
Instıtýsıonaldyq ózgerister de jobanyń mańyzdy bóligi sanalady. Depýtat memlekettik bılik qurylymynyń jańasha úlgisi usynylǵanyn aıtty. Birpalataly Parlament qurý, «Halyq keńesi» atty joǵary konsýltatıvtik organ qalyptastyrý sııaqty bastamalar jańa saıası baǵdardyń aıǵaǵy retinde baǵalandy. Magerramovtyń paıymynsha, endigi jerde memleket tek úderisterdi basqarýshy emes, azamattarǵa qyzmet etetin ınstıtýtqa aınalýǵa tıis.
Ol qujattyń qoǵamda keń qoldaý tapqanyn atap ótti.
«El turǵyndarynyń basym kópshiliginiń jańa Konstıtýsııa jobasyn tolyq qoldaıtynyn senimmen aıta alamyn. Muny tek Komıssııanyń ǵana emes, sonymen qatar elimizdiń barlyq óńirlerindegi jańa Konstıtýsııa jobasyn ártúrli qoǵamdyq, áleýmettik toptarmen, qoǵamdyq uıymdarmen jáne eńbek ujymdarymen talqylaý aıasynda kezdesýlerdi ótkizgen Halyq partııasy fılıaldarynyń jumysyna baılanysty aıtyp otyrmyn», dedi depýtat.
QHP aımaqtarda jańa Konstıtýsııa jobasyn talqylaýdy jandandyrdy
Májiliste Qazaqstan Halyq partııasy fraksııasynyń bastamasymen barlyq óńirlik fılıaldar, sarapshylar, ǵylymı jáne zańgerlik qaýymdastyq ókilderi, kásipkerler men úkimettik emes uıymdar qatysqan keńeıtilgen otyrys ótken. 100-ge jýyq adam qatysqan jıynda jańa Konstıtýsııa jobasyna biraýyzdan qoldaý bildirilgen.
«Jańa Konstıtýsııanyń jobasy – ótken kezeń men búgingi basymdyqtardy túsine otyryp, Qazaqstannyń bolashaqtaǵy jańa baǵdary týraly sheshim qabyldaǵan halyqtyń birligi men birtutastyǵynyń belgisi dep aıtýǵa bolady. Joǵaryda aıtylǵandardy eskere otyryp, biz jańa Konstıtýsııanyń jobasyn jalpyhalyqtyq referendýmǵa shyǵarýdy usynamyz», dep túıindedi Magerram Magerramov.
Vıse-prezıdent jáne Halyq keńesi: Jańa Ata Zań jobasy Varshavada tanystyryldy