Memleket basshysy Qyzylordada ótken Ulttyq quryltaıda «Elimizdiń rýhanı-mádenı murasyn álemge tanytý týraly bastamalar kóterildi. Soǵan sáıkes josparly jumys júrgizilip jatyr» degeni belgili. Sonyń aıǵaǵyndaı, qazaqtyń tól mádenıeti men tanymyn kórsetetin dástúrli oıý-órnegi resmı túrde ISESKO-nyń Islam álemi muralary tizimine endi. Bul týraly keshe Memlekettik keńesshi Erlan Qarın áleýmettik jelidegi paraqshasynda jarııalady.
Qazaqtyń tól mádenı ereksheligine jatatyn qoshqarmúıiz, botamoıyn, túlkibas, qusqanat jáne taǵy basqa oıýlary – kóshpeliler órkenıetiniń birden-bir kórsetkishi. Zer salyp qaraǵan jan oıý-órnekterden ósip kele jatqan, ushyp bara jatqan nemese alǵa jyljýshy qubylysty ańǵarady. Demek, bular damýdyń belgisi desek qatelese qoımaımyz. Halqymyzdyń ulttyq kody oıý-órnekterdiń mazmunynda deýge tolyq negiz bar.
«Qazir Qazaqstan materıaldyq emes mádenı muralar tizimine óz nysandaryn belsendi túrde engizip jatqan 25 eldiń qataryna kiredi. Biraq munymen toqtap qalýǵa bolmaıdy. Tól tarıhymyzdy zerdeleý, ónerimiz ben mádenıetimizdi órkendetý úshin áli de kóp jumys istelýge tıis. Bul sharalar aldaǵy ýaqytta da jalǵasa beredi» degen Prezıdent sóziniń dáleli osy shyǵar.
Qazaqtyń dástúrli oıý-órnegi ISESKO-nyń Islam álemi muralary tizimine engeni týraly sheshim 11 aqpanda ótken ISESKO Islam álemi muralary komıtetiniń 13-sessııasynda qabyldanypty. Memlekettik keńesshi Erlan Qarın bul týraly:
«Oıý-órnek – mádenı biregeıligimiz ben tarıhı sabaqtastyǵymyzdy nyǵaıtýǵa yqpal etetin negizgi etnomádenı kod.
Oıý-órnektiń ISESKO-nyń bedeldi tizimine enýi – Qazaqstannyń materıaldyq emes mádenı murasyn halyqaralyq deńgeıde ilgeriletýdegi mańyzdy qadam.
Buǵan deıin, ıaǵnı 2023 jyly ISESKO tizimine túrki órkenıetiniń basty nyshandarynyń birine aınalǵan dástúrli «Toǵyzqumalaq» oıyny qosylǵan edi.
Prezıdenttiń Ulttyq quryltaı otyrystarynda bergen tapsyrmalaryna sáıkes, Qazaqstannyń mádenı mura nysandaryn IýNESKO jáne ISESKO tizimderine engizý jumysy jalǵasady», dep málimdedi.
Máselen, qoshqarmúıiz oıýy qazaq halqynyń búkil tynys-tirshiligin tanytady. Keı qoldanysta ol qyryqmúıiz, syńarmúıiz, arqarmúıiz bolyp túrlenip otyrady. Qoshqarmúıiz tórt tarmaqtan quralyp, ortasyndaǵy aıqysh dúnıe tepe-teńdigin kórsetedi. Bulardyń qupııasyn ashyp, tehnologııalyq jetistiktermen qabystyra alsaq, utarymyz kóp.