Memlekettik tilde bilim alatyn oqýshynyń sany jyl sanap artyp kele jatqan Rýdnyıdaǵy aǵaıyn 2023 jyly irgetasy qalanǵan qazaq mektebiniń ashylýyn asyǵa kútken edi. Kópten kútken bilim ordasy esigin aıqara ashqan kún de kelip jetti. «Keleshek mektepteri» ulttyq jobasy aıasynda el ıgiligine berilgen bilim oshaǵynda 900 bala oqıtyn bolady.
Mektep oqýshylaryn, ustazdardy, ata-analar qaýymyn arnaıy quttyqtaı barǵan oblys ákiminiń orynbasary Baqytjan Narymbetov jańa mekteptiń ashylýyna oraı ótken saltanatty is-sharaǵa qatysyp, kópshilikke bilim salasynda bolyp jatqan oń ózgeristerdi qulaqqaǵys etti.
«Búgingi mekteptiń ashylýy – el táýelsizdiginiń 35 jyldyǵymen, sondaı-aq qazaq halqynyń uly aǵartýshysy Ybyraı Altynsarınniń 185 jyldyǵymen tuspa-tus kelip otyr. О́ńirde Memleket basshysynyń bastamasymen iske asyrylǵan «Keleshek mektepteri» ulttyq jobasy sheńberinde 4500 oryndyq 6 mektep ashyldy. Bizdiń óńirimiz Memleket basshysynyń tapsyrmasyn oryndady. Endi bizdiń aldymyzda osy mektepterdiń áleýetin tıimdi paıdalanyp, balalarǵa sapaly bilim berý, olardy elge paıdasy tıetin sanaly azamat etip tárbıeleý mindeti tur. Jańa mektep qutty bolsyn! Barshańyzǵa sáttilik, mektep ujymyna jemisti eńbek pen tolaǵaı tabystar tileımin!», dedi ákim orynbasary.
Rýdnyı qalasynyń Qurmetti azamaty, ardager ustaz Ǵabdolla Ahmetjanov aqsaqal da mektep shákirtterine izgi tilek, aqyl-keńesin aıtyp, aq batasyn berdi.
Alty korpýstan turatyn úsh qabatty jańa mekteptiń synyptary balanyń sapaly bilim alýyna qajet zamanaýı ádistemelik quraldarmen, kompıýter qurylǵylary, ınteraktıvti taqtamen jabdyqtalǵan. Shet tilder kabınetterine lıngafon ornatylǵan. Bilim ordasynda oqýshynyń qarym-qabiletiniń jan-jaqty ushtalýyna barlyq jaǵdaı jasalǵany kózge uryp tur. Kishi, orta, joǵary býyn oqýshylary bir-birinen bólek jeke bloktarda bilim alady. Balanyń tanym órisin keńeıtip, ǵylymı izdeniske jeteleıtin arnaıy hımııa, bıologııa, fızıka, ınformatıka, robottehnıka pándik kabınetteri, sondaı-aq STEAM-zerthanasy bar.
Mekteptiń 3 sport zaly, horeografııa zaly, keń májilishanasy, jaıly ashana jumys istep tur. Eńbekke baýlý sheberhanalaryna túrli stanoktar, tigin mashınalary qoıylǵan. Aýlada oqýshylardyń júrip-turýyna, otyryp demalýyna qolaıly birneshe alań bar.
Bilim ordasynyń kire berisi men ár qabatyna erekshe bilim berý qajettiligi bar balalarǵa arnalǵan lıft, pandýs ornatylǵan. Arnaıy jabdyqtalǵan sanıtar bólmeleri, ınklıýzııany qoldaý kabıneti jumys istep jatyr.
Jańa mektepte 62 adam, onyń ishinde 34 muǵalim jumys isteıdi. Bilim ordasynda, qazirshe, 400-den astam oqýshy bilim alyp jatyr. Alaıda aldaǵy oqý jylyna deıin bala sany 900-den kem bolmaıdy.
«Mekteptiń kitaphanasy óte keń eken. Mundaǵy baı kitap qory bizdiń jan-jaqty bilim alyp, elimizdiń tarıhı, mádenı murasymen tanysýǵa múmkindik beredi dep oılaımyn. Sondaı-aq óte yńǵaıly kovorkıng aımaqtardy, óner stýdııasyn kórip tańqalyp otyrmyn. Sabaq oqyp, shyǵarmashylyqpen aınalysýǵa qolaıly», deıdi 6 synyp oqýshysy Ajar Rústemova.
Rýdnyıdaǵy №8 qazaq mektebi – óńirde keıingi birneshe jyldyń ishinde paıdalanýǵa berilgen altynshy bilim ordasy. Buǵan deıin Qostanaı men Arqalyqta, sondaı-aq Zarechnyı, Qusmuryn aýyldarynda 5 keleshek mektebi paıdalanýǵa berilgen.
Qostanaı oblysy