ASTANA. 26 naýryz. Memleket basshysy «Qazatomónerkásip» UAK» AQ basqarmasynyń tóraǵasy Nurlan Qapparovtyń kenetten qaıtys bolýyna baılanysty onyń otbasy men týystaryna kóńil aıtý jedelhatyn joldady. Bul týraly akorda.kz habarlady.
Jedelhatta el táýelsizdiginiń alǵashqy jyldarynda N.Qapparov jastar arasynan daralanyp shyqqan kásipker retinde tanylǵany atap ótilgen. Ol ár jyldary «Qazaqoıl» ulttyq munaıgaz kompanııasy» JAQ prezıdenti, Qorshaǵan orta jáne sý resýrstary mınıstri, «Qazatomónerkásip» UAK» AQ basqarmasynyń tóraǵasy boldy, sondaı-aq basqa da jaýapty laýazymdarda ózine júktelgen mindetterdi abyroımen atqardy.
«N.Qapparov óziniń mol bilimi men tájirıbesin árdaıym elimizdiń ósip-órkendeýine jumsaǵan daryndy uıymdastyrýshy boldy. Halqymyz onyń esimi men eńbegin umytpaıdy», – delingen jedelhatta.
Joldybaı Bazar.
Derek, sýret: akorda.kz.